Тарих пен тіл тамырлас тәрбие сағаты

«ТАРИХ ПЕН ТІЛ ТАМЫРЛАС»

атты ашық тәрбие сағатының сценарийі

Шымкент қаласы.

Манап Өтебаев атындағы жоғары жаңа технологиялар колледжі

Дауреханова Шолпан Амангелдиевна

«Қоғамдық пәндер» кафедрасының оқытушысы

Тақырыбы: «Тарих пен тіл тамырлас»

Өтілу барысы: ашық тәрбие сағаты

Тобы: «Ақпараттық жүйелер және есептеу техникасы» бөлімі, АЖ-04-22 тобы

Күні: 13.12.2023 ж.

Өтетін орны: акт залы

Мақсаты: Оқушыларға мемлекеттік тілдің өркендеп, оянуына, мемлекеттік тілімізді сүюге, мемлекеттік тілді аяққа баспай, мәртебесін биік ұстау жөнінде, әр ұлттың өзіндік ерекшеліктері, салт-дәстүрі, діні, тіл ерекшелігі болатынын түсіндіру. Оқушылардың ой-өрісін, дүниетанымын кеңейтуМіндеті: Ана тілінің адам өміріндегі маңыздылығын түсіндіру; ана тіліне деген құштарлықты арттыру; ана тілін сүюге, құрметтеуге тәрбиелеу;

Фанфар

1-жүргізуші:

Тарихым тілімменен күн кешеді,

Өткенім бүгінгімен үндеседі.

Тіліммен байланысты туған тарих

Тарихпенен тілімді кім кеседі?

2-жүргізуші: Ассалаумағалейкүм, тереңге тамыр жіберген тарихынан тәлім алған, туған тілдің тұнығының нәрін алғандар!

1-жүргізуші: Армысыздар, бармысыздар, өрлі де асқақ рухты тәуелсіз елдің ұлағатты ұстаздары мен жас ұландары! «Жеткіншектің жеті жарғысы» жобасы аясында өтетін «Ақпараттық жүйелер және есептеу техникасы» бөлімі, АЖ-04-22 тобының «ТАРИХ ПЕН ТІЛ ТАМЫРЛАС» атты ашық тәрбие сағатына қош келдіңіздер!

БИ: топ студенттері

БЕЙНЕРОЛИК

1-жүргізуші: Қаншама қиындық болса да, оларға қарсы қаншама қитұрқы жұмыс жасалса да, қиянат болса да, қазаққа тапжылмай адал қызмет еткен, оны ұлт ретінде сақтап қалған, үзіліп қалған мемлекеттігін қайта жаңғыртқан екі күш бар: ол – қазақ тілі мен қазақ тарихы. 2-жүргізуші: Қазақтың қанына да, жанына да айналған –тарих пен тіл ажырағысыз екі элемент тәрізді. Бір-бірінсіз өмір сүре алмайды. Тілді білген адам қашан да тарихқа тереңдейді. Кешегі жаралы жылдардың жаңғырығы саналатын Желтоқсан оқиғасына 37 жыл толса, бүгінде тәуелсз ел атанып туымызды тіккенімізге 32 жыл. Тәуелсіздік жолында «мың өліп, мың тірілген» қазақтың рухын ешкім өшіре алмады, тамыр тарихы мен туған тілін ешкім өлтіре алмады. (қобыздың үнімен)

Асанқайғы рөлінде шығады

Құйрығы жоқ, жалы жоқ-Құлан қайтіп күн көрер?!Аяғы жоқ, қолы жоқ-Жылан қайтіп күн көрер!?Шыбын шықса жаз болып -Таздар қайтіп күн көрер?!

Жалаң аяқ балапан,Қаздар қайтіп күн көрер!?

(қобыздың үнімен)

Қазыбек би рөлінде шығады

–Біз қазақ деген мал баққан елміз,

Бірақ ешкімге соктықпай жай жатқан елміз.

Елімізден құт-береке қашпасын деп,

Жеріміздің шетін жау баспасын деп,

Найзаға үкі таққан елміз,

Ешбір дұшпан басынбаған елміз,

Басымыздан сөзді асырмаған елміз.

Досымызды сақтай білген елміз,

дәмі, тұзын ақтай білген елміз,

Асқақтаған хан болса,

Хан ордасын таптай білген елміз.

Атадан ұл туса, құл боламын деп тумайды,

Анадан қыз туса, күң боламын деп тумайды.

Ұл мен қызды қаматып отыра алмайтын елміз.

(қобыздың үнімен)

Қайрат Рысқұлбеков рөлінде шығады

Күнәдан таза басым бар,

Жиырма бірде жасым бар,

Қасқалдақтай қаным бар,

Бозторғайдай жаным бар.

Алам десең, алыңдар.

Қайрат деген атым бар,

Қазақ деген затым бар,

Еркек тоқты құрбандық.

Атам десең атыңдар!

ӘН: «Желтоқсан желі»

1-жүргізуші: Ұлттық тіл– халықтың өзіне тән санасын, парасатын, бүкіл болмыс-тіршілігін ұрпақтан-ұрпаққа жеткізетін күре тамыры. Тіл тағдыры – ұлт тағдыры, жер бетіндегі бар халықтың қасиетті де қастерлі асыл қазынасы.

2-жүргізуші: Иә, тіл – әрбір елдің ұлттық мақтанышы. 1999 жылы ЮНЕСКО-ның Бас конференциясында «21 ақпан – Халықаралық ана тілі күні» ретінде белгіленсе, ал біздің елімізде «22 қыркүйек – Қазақстан Республикасы халықтарының тілдері күні» болып ҚР Президентінің 1998 жылғы 20 қаңтардағы Жарлығымен бекітілді.

1-жүргізуші: Ендігі міне сол атаулы мереке жүйелі түрде жыл сайын өткізіліп келеді. Осылайша, тәуелсіз еліміздің қоғамдық өмірінде өзіндік орны бар жаңа мереке пайда болды. Бұл – Қазақстанда тұратын барша ұлт өкілдерінің тіл мерекесі.

2-жүргізуші: Қазақтың ХХ ғасырдың басында жарқырай жанған жарық жұлдыздарының бірі, текті ақыны М.Жұмабаев: «Тіл – адам жанының тілмашы... Тілсіз жүрек түбіндегі ... сезімдер, жан түкпіріндегі асыл ойлар жарық көрмей қор болып қалар еді.Адам тілі арқасында ғана жан сырын сыртқа шығарып, басқалардың жан сырын ұға алады. Ойлаған ойын сыртқа шығарып басқаға ұқтыра алса, адамның не арманы бар» десе, сол ойды қостағандай тіл білімінің зерттеушісі, ғалым Мәулен Балақаев: «Тіл – адам ойының айнасы. Адамның тіл жұмсау дағдысынан, тіл мәдениетінен оның кім, қандай адам екенін аңғару да қиын емес » деп тілдің өзіндік рөлін айқын көрсетеді. Сондықтан да тіл – адам қоғамы туындыларының ішіндегі асылдың асылы, қымбаттың қымбаты, адамды адам еткен ұлы күштердің бірі Һәм оның құралы.

КӨРІНІС:

ТЕРМЕ: «Қапездің қоштасуы»

БЕЙНЕРОЛИК

1-жүргізуші: Тіл – жалпы қоғамның, рухани өмірдің бүкіл мәдениеттің тұтқасы. «Тілі бардың – түбі бар» деп білген қазақ халқы бағзы замандардың өзінде-ақ тіл өнерін өнердің өрі, мәдениеттің төрі «Өнер алды – қызыл тіл» деп бағамдаған әрі бағалаған.