Терезе алдындағы бау-бақша мектепалды балаларға

«Терезе алдындағы бау-бақша»

Мектепке дейінгі кезенде бала қоршаған ортаны танып біледі. Баланың табиғатты танып білуге деген қызығушылығын оята отырып, оларды табиғатпен таныстырып қана қоймай, оны түсінуге, өсімдіктер мен жануарларды қорғауға, табиғаттың сұлулығын сезіне білуге үйретеді.

«Жұлдыз» бөбекжай балабақшасындағы «Балауса» мектепалды даярлық тобында мектеп жасына дейінгі балалардың бау-бақша жайлы білімдерін арттырып, өсімдіктер мен көкөністерді егудің барысымен таныстыру мақсатында «Терезе алдындағы бау-бақшаны» күтіп баптаудамыз.

Бау-бақша дегеніміз өзіндік ерекше құбылыс. Тұрғын үйде немесе балабақшада өсімдіктер мен көкөністер өсіру – бұл ерекше шығынды талап етпейді, балалардың әуестігі мен байқағыштығын дамытады, өсімдіктер өмірін жақсы білулеріне септігін тигізеді. Көкөніс өнімдері әдемі көрінеді және бөлме өсімдіктерінің басым бөлігімен жақсы үйлеседі. Оны күтіп-баптау, оны әркез суарып, арам шөптерін жұлу – қажырлы еңбекті қажет етеді.

Балаларды балабақша табалдырығынан еңбекке баулып, айналасындағы тірі табиғатқа қамқорлықпен қарауға деген сезімдерін арттыру мақсатында балабақшамызда терезе алдында шағын бау-бақшамызды қалыптастырдық.

Балалармен бау-бақшаны отырғызу барысында өсімдіктер мен көкөністердің жетілу барысын бақылап, оларға күтім жасадық. Аталған іс-шара арқылы балалардың эстетикалық сезімдерін арттырып, еңбек іс-әрекетіне баулу көзделді. Бау-бақшаны отырғызу барысында балалардың жұмысқа деген икемділіктері мен ептіліктерін байқадық. Олардың әрбір жасаған жұмысын тиянақты орындағаны көңіл қуантпай қоймады.

Бау-бақшаға уақытылы күтім жасау үшін әр күнге кезекші бала қойып, жұмысты сүйіспеншілікпен жасауға тәрбиелеу назардан тыс қалмады.

Балалардың әрқайсысы өз кезекшілігін асқан ынтызарлықпен күткенін ерекше атап өтуге болады. Тәрбиеленушілер терезе алдындағы бау-бақшамыздың әрбір өсіп шыққан өсімдік пен көкөністеріне риза болып, қуаныштан жүздеріне күлкі ұялап, жасаған еңбегінің жемісін көріп жүр. Бұл жұмыстар арқылы балаларды еңбекке тәрбиелеп қана қоймай, бау-бақшаның пайдасы жайлы оларды ақпараттандырдық. Балалардың қуанышында шек жоқ, ал терезе алдындағы бау-бақшамыз тобымызда ерекше орын алып тұр.Терезе алдындағы бау-бақша әрбір балабақшада орын алса, балалар еңбекке қызығушылықпен қарайды деген сенімдеміз.

«Балауса» мектепалды даярлық

тобының тәрбиешілері

А.Кожахмет

Ж.Макашбаева