Тілім менің тірегім тәрбие сағаты 6 сынып

«№8 жалпы орта білім беретін мектебі» КММ

Тілім - менің тірегім

(жоспарлы тәрбие сағаты)

Өткізген Жиеналина Айнур Кажигалиевна

2017-2018 оқу жылы

Күні : 19.09.2017

Сыныбы: 6 «Б»

Тәрбие сағатының тақырыбы: Тілім – менің тірегім

Мақсаты: Жас ұрпаққа ана тілінің қадір қасиетін түсіндіру, тіл мерейін көтеру, тілдің қоғамдық-әлеуметтік қызметімен таныстыру, шығармашылық қабілеттерін дамыту.

Көрнекілігі: қанатты сөздер, ақын-жазушылардың суреттері, бүктемелер, реферат, альбомдар.

Мұғалім сөзі:

Тіл-тәуелсіздік тірегі. Халық өмірінің өлшемі де тіл. Тәрбие тілден басталады. Ұлттық өнердің барлығы да тілден басталады. Тілсіз ештеңе дамымайды . Республикада ана –тіліміз- қазақ тіліне «мемлекеттік тіл» деген мәртебе беріліп, тіл туралы тұңғыш заң 1989 жылы, ал екінші рет 1997 жылы шілденің 11-жұлдызында қабылданды. Елбасымыз Нұрсұлтан Назарбаевтың жарлығымен «22 қыркүйек - Қазақстан халықтарының тілдерінің күні» болып жарияланды.

1-жүргізуші:

Армысыздар, ардақты халқым менің,

Бөлісейік бұл күннің алтын кенін.

Тілді сүйер қауымға басымды иіп,

Сәлемдесіп жүздесу-салтым менің.

Ұшырмай көкіректен жыр кептерін,

Өлеңсіз аша алам ба сыр беттерін ?!

Жаңа күш, жаңа қуат тілеуменен,

Өзіңе басымды ием, көрерменім.

2-жүргізуші:

Қош келіпсіз, ақ жанарлы құрбылар,

Жүздеріңнен мейірім мен нұр тамар.

Алдарыңда жауқазындай құлпырған,

Біз алаңсыз балғын шақты балалар.

Бар өнері енді ортаға салайық.

6 «Б» -дан қабыл алғай сәлемді,

Мерекесі тіліміздің құтты болсын, халайық!

1-жүргізуші:

Біздің бүкіл тарихымыздың олжасының бірі-ата-бабаларымыз ақ найзаның ұшымен, ақ білектің күшімен қанын төгіп жүріп қорғап қалған қасиетті жеріміз болса, екіншісі- сол ата-бабалардың арқасында бар бояуымен, сырлы сазымен осы күнге аман-есен жеткен қазақ тілі. Бұның өзі қазақ тілінің мәртебелі де қасиетті тіл екендігінде дәлел бола алады.

2-жүргізуші:

Халқымыз үшін басты мәселе ұлты, ұлтының тілі, мәдениеті, әдет-ғұрпы, салт-дәстүрі, бір сөзбен айтқанда ұлттық құндылықтары. Бұл құндылықтардың дамуы мен өркендеуі келешекте мемлекеттің біртұтастылықты күшейтудің басты шарттарының бірі екені даусыз. Осы себепті мемлекетіміз үшін мемлекеттік тіл қазақ тілі ұлтымыздың мәдени, рухани бірлігінің даму көрсеткіші болуы тиіс.

1-жүргізуші:

Тіл-біздің ең қымбат қазынамыз. Біздің тіл-әйгілі би шешендеріміз, атақты Жамбыл, Абай, Мұхтар, Ілияс сынды данагөйлеріміз сөйлеген тіл. Туған тілімізді жете білу арқылы өнер-білімнің, мәдениет пен ғылымның биігіне жете аламыз. Қазақстанның болашағы қазақ тілінде!