Туризм саласының даму мәселелері туралы мақала

НЕГЕ

ТУРИЗМ САЛАСЫ

ДАМЫМАЙДЫ

Туризм — елдің рухани келбеті мен экономикалық әлеуетінің айнасы. Жер көлемі бойынша әлемде 9-орында тұрған Қазақстан неге әлі күнге дейін бұл саланы толық дамыта алмай отыр? Бұл — көпшіліктің көкейіндегі сұрақ.

Қазақстанда Бурабайдың тұнық суы, Көлсайдың көркемдігі, Шарын шатқалы, Алатаудың асқақтығы бар. Алайда осындай табиғи байлықтарымызды әлем әлі де толық тани қойған жоқ. Себебі туризм — жай табиғатты көрсету емес, ол жол, қызмет көрсету, қауіпсіздік, жарнама мен инфрақұрылым сияқты бірнеше саланың бірлескен жүйесі.

Көрші Грузия мен Қырғызстан туризмді табыс көзіне айналдырып отыр. Грузия шарап мәдениетін, таулы аймақтарын, тарихи мұрасын жақсы жарнамалап, турист тартуда. Ал Қазақстанда әлі де болса жол сапасы нашар,

ағылшын тілді гидтер аз, сервис көңіл көншітпейді.Біздің тағы бір әлсіз тұсымыз — жарнама мен елдің имиджі. Түркия десе демалыс ойға оралады, ал Қазақстан ше? Біз өз елімізді әлемге қалай көрсетіп жүрміз? Бұл сұрақ жауапсыз қалып келеді.

Туризмнің дамуына сана да әсер етеді. Өз байлығымызды өзіміз қадірлемесек, өзгелер қайдан бағаласын? Қоқысқа толы көл жағасы, жөнделмеген жол — шетелдіктер үшін жағымсыз әсер қалдырады.

Қорытындылай келе, Қазақстан — туризм тұрғысынан алып, бірақ ұйықтап жатқан ел. Сол алыпты ояту — біздің қолымызда. Жүйелі жоспар, сапалы сервис, ұлттық таным мен жарнама арқылы ғана біз бұл саланы алға жылжыта аламыз.

Қалманбаева Айдана