Ұрпақтан ұрпаққа мақаласы қазақ тілі пәні мұғалімдеріне

«Қазына» әжелер тобына 10 жыл толды

Елбасының жақында ғана жолдаған «Ұлы даланың жеті қыры» атты мақаласында төл тарихын білетін, бағалайтын және мақтан ететін халықтың болашағы зор болады деп сенім білдірген. Соған орай, Өскемен қаласы №45 бейімделген орта мектебінде «Ұрпақтан ұрпаққа» атты шығармашылық концерт арқылы әжелеріміз Ұлы даланың өнерін паш еттті. Аталған білім ордасында тура 10 жыл бұрын тұсауын кескен «Қазынаға» 10 жыл толып отыр. Ұлылықты әнмен әрлеп ұрпаққа жеткізуді мақсат еткен әжелерімізді құттықтауға облыстық, қалалық мәслихат депутаттарынан, қалалық әкімдіктен, ардагерлер кеңесінен өкілдер келіп, алғыс хаттарын тарту етті. Көнцерт топтың көркемдік жетекшісі Абдуллина Нұржамал Слямханқызының барша халыққа арналған шашу әнінен басталып, ауылға деген сағыныштан туған «Ауылым – алтын бесігім» бөлімімен жалғасын тапты. Әжелеріміз сахна төрінде құрт жаю, тері илеу, жүн иіру, ши тоқу сияқты небір өнер түрлерін көрсетіп, ауылдың иісін аңқытып, көнені жаңғыртты. «Салт-дәстүрім – алтын қазынам», «Халық әндері», «Еліме арнап ән салам», «Ұмытылмас әндер» деген бөлімдермен көрерменді өнегелі өнерлерімен баурап алды.

Қыздарын қияға, ұлдарын ұяға қондырып, Кенен атаның келініндей мейірімді, инабатты келін, саналы ұрпақ тәрбиелеп отырған әжелеріміз өскелең ұрпаққа қазақи салт-сананың, дәстүрдің, өнердің қандай болу керек екенін үлгі етті.

«Қазынаның 10 жылы» тағылымы мол шараларға толы екені экрандағы таныстырымнан көрінді. «Ауылым - алтын бесігім» акциясы аясында Күршім,Тарбағатай, Катон, Ұлан , Қалбатау, Глубокое, Зайсан аудандарында қойылған концерттер, көшіп келген ағайындарға арналған «Ән - ерулік» шашуы, «Қателігіңді қайталама, балам» атты алдын-алу шаралары,

ұлттың ұстазы Қанипа Бітібаеваның еңбек өтілінің 45 жылдығына орай «Кәусар бұлағымсың» атты жыр-шашулары. «Экспо-2017» көрмесіне барып, президент қорына түсуі, 2018 жылы қазан айында әкімшіліктің қолдауымен Астана қаласында №76 лицейде және Лесная полянадағы №2 мектепте қойылған тәрбиелік маңызы зор концерттер, барлық мектептердегі, әсіресе №45 бейімделген орта мектебіндегі өтілетін тәрбиелік іс-шаралардан табыла білуі – асыл әжелеріміздің өнегелі өмірлерінің айғағы. «Қазына» тобындағы ардақты әжелерімізді мерейтоймен құттықтап, ұзақ ғұмыр, баянды бақыт тілейміз.