Ұят болмасын бағдарламасы бойынша Наурыз туралы мақала

«Ұят болмасын!»

2019 жылдың Әз Наурыз мерекесін Семеновка орта мектебінде ерекше қарсы алып, оқушылар мен ата-аналарға қуаныш сыйлады. «Ұят болмасын» бағдарламасының форматында өткізілген мерекеге барлық оқушылар мен ұстаздар ат салысты. Ақылбай ақсақалдың ауылына жиналған ел-жұрт қазақтың салт-дәстүрлерін тізбегімен көрсете білді. Ең алдымен ақсақалдың үйіне жаңа келін түсіруден бастап, келін оң аяқты болсын деп жасалған ырым-жоралғылары көпшілікті көтеріңкі көңіл күйге бөлей білді. Жалпы қазақ халқы қонақ келсе құт деп білетін өте ырымшыл, ата –баба дәстүрін атадан-балаға мұра етіп келе жатқан жайдарлы халық емес пе? Сол қазақтың өзіне тән мінезін осы көріністер арқылы көрермен қауымға жеткізуді мақсат еткен ұстаздар мен оқушылар ата мен әже, бала мен немере, ене мен келін образдарын сомдауда аянып қалған емес.

«Туғанда дүние есігін ашады өлең, өлеңмен жер қойнына кірер денең» деп тегінде айтпаған ғой бабамыз. Жас сәбидің аяғын қаз-қаз бастап жүре бастаған шағындағы «Тұсаукесер» рәсімін де шебер көрсете білді. Бұл да баланың ертеңгі күні қандай адам болатынын болжайтын жақсы дәстүрлдің бірі. Құда күту, шапан жауып құрмет көрсету, төс қағысу, сырға салу, бата беру, байғазы осы сияқты өмірімізбен тығыз байланыста болатын дәстүрлерді сахнада қою, өсіп келе жатқан жас ұрпаққа үлгі мен тәрбие болары сөзсіз. Себебі, біздің болашығымыз осы өскелең жас ұрпақтың қолында , ал ата-баба дәстүрін олардың санасына сіңдіру ата-ана мен ұстаздырдың абыройлы міндеті деп білемін.

Наурыз-көктем мерекесі. Наурыз-қуаныш мерекесі.Бақыт пен шаттық мерекесі. Наурыз-жаңа серпін, жаңа леп. Сол себепті де Наурыз мерекесін жұп жазбай жылда қарсы алайық. Осы мектепшілік Наурыз мерекесін ұйымдастырған мекетептің қоғамдық-гуманитарлық әдістемелік бірлестігінің ұстаздарына мың да бір алғысымды білдіремін. Еңбектеріңіз еленіп, биік шыңдардан көріне беріңіздер.

Қазақ тілі мен әдебиет пәнінің мұғалімі:

Зухра Кайрбековна.