Ұжымшылдық пен ынтымақтастық туралы сынып жетекші мақаласы

«Ұжымшылдық» - ынтымақтастық негізі

Әдетте, «ұжымшылдық» үғымына «өз іс-әрекетіңді қоғамның, ұжымның іс-әрекетімен біріктіре білумен байқалатын идеялық-адамгершіліктік қасиет» немесе «тиімді бірлескен қызмет, ынтымақтастық және ұйымшылдық орта» деген сияқты анықтамалар беріледі. Ұжымшылдық қасиеті жоғары адам ұжымдастарымен, басқалармен қуанышта бірге қуанып, сәтсіздікте бірге күйініп ортақтасады, ұжымның атына барынша кір келтірмеуге тырысып, ортақ іске жұмыла кіріседі, қоғамдық борыш пен өз жора-жолдастары, ұжым үшін жауапкершілікті сезеді.

Ұжымшылдыққа қарама-қарсы қасиетке жекешелену, оңашалану жатады. Ондай қасиетке ие адамнан өз басын күйттегеннен басқаны күту бекер, неге десеңіз, өзгенің талап-тілегімен санаспайды, тіпті кейде өз мақсаты жолында ортақ істі тәрк етеді. Осындай ұжымшылдықтың кертартпа қасиеттерінің шәкірт бойынан табылуына жол бермес үшін алдын-ала ұжымшылдыққа бағытталған іс-шараларды жоспарлап, біртіндеп жүзеге асырудың маңыздылығы зор.

Өскелең ұрпақты жан-жақты демеу негізінде тыңғылықты тәрбиелеуде білім қызметкерлеріне артылған үмітті ақтау үшін өз құндылықтарымызды жете түсініп, дәріптеуден бастау қажет.

ҚР Тұңғыш президенті Н.Ә. Назарбаевтың 2019 жылғы тәуелсіздік мерекесі қарсаңында телеарналарға берген сұхбатында ««Бәріміз - біріміз үшін, біріміз - бәріміз үшін» деп жұмыс істеуіміз керек» деген үндеуінің табыстылығына қол жеткізуді осындай мектеп қабырғасындағы бала тәрбиесінен бастаған жөн. Сонда ғана әрбір бала өзара теңесіп, тәрбиеде бұл бастама үлкен олжаға айналары сөзсіз.

Мен жатақхана тәрбиешісі ретінде тәрбиеленушілердің арасында ынтымақтастыққа негізделген орта қалыптастыруды, тәрбиеленушінің өзін-өзі реттеуіне, тәрбиелеуіне уақтылы көмек, бағыт-бағдар беріп ықпал етуді, олардың тәлімгеріне айналуды борышым деп білемін. Тәрбиеші ретінде кәсіби даму мақсатымның өзін «Топтық қарым-қатынас арқылы тәрбиеленушілердің ұжымшылдығын арттыру» деп алып, өз кезегінде атқаратын жұмыстарымды, әрине, ұжымшылдықты арттыруға бағыттап жоспарладым.

Ұжымшылдықты шәкірт бойында қалыптастыру, дамыту үшін алдымен топтағы тәрбиеленушілерден ынтымақтастыққа бейімділікті анықтайтын социаграмма сауалдарына жауап алынып, нәтижесі сараланды. Топтың ортақ мақсаты айқындалып түсіндірілді. Тәрбиеленушілердің арасында әрқашан сыйластыққа, қамқорлыққа негіздеп өзара көмек көрсетуді ұйымдастыру ортақ пікірлестікті туындатты. Сондай-ақ, алғашқыда жеке жұмыс жасап, кейіннен ортақ іске саналы түрде қатысуға жұмылдыруда әр тәрбиеленушінің белсенділігі мен қабілеті ескерілді.