Ұжымшылдықтың тәрбиелік маңызы туралы мақала

Ұжымшылдық – үлгі болар құндылық

Ұжымшылдық – жас ерекшелігіне қарамастан әрбір адамның бойында басқа адамға деген сыйластықты, бауырмалдықты, қол ұшын беру сезімін калыптастыру үшін табылуы қажет құндылық.

Бір сөзбен айтқанда, ұжымшылдық – үлгі болар құндылық. Әрбір адам өзін қоршаған ортаның, яғни қоғамның бір бөлшегі саналады, сондықтан адамзат атаулының өмір сүруін жеке дара елестету мүмкін емес. Дана халқымыздың «Жалғыз жүріп жол тапқанша көппен бірге адас» дейтін нақылының маңызы әлі күнге жойылмауының бірден бір себебі де сол болар.

«Өзі жақсы кісіге бір кісілік орын бар» дегендей, жаңа қонысқа көшсек те, жаңа ұжымға жұмысқа орналассақ та, балаларымызды мектепке жаңадан бергенде де ортаға тез сіңісіп бейімделуі көбіне әркімнің өзіне, бойындағы ұжымшылдық құндылығының қалыптасуының жоғарылылығына байланысты дер едім.

Шәкірттерін тәрбиенің түрлі бағыттарын қамти отырып, жан-жақты етіп тәрбиелеу - ұстаз алдындағы зор жауапкершілік. Сол жауапкершілік жүгін арқалай жүріп, мен бала бойынан табылуы тиіс құндылықтар төңірегінде жиі ойланамын. Өзгенің мүддесін өз мүддесінен де жоғары қою, өзі мұқтаж бола тұра сұрағанын қиып, өзгеге көмек қолын созу екінің бірінің қолынан келе бермейді. Ал балалардың осы қасиеті басым болуына ықпал етіп, ұжымшылдыққа баулу өз алдына бір жауапкершілігі зор міндет.

Мектепте өзім координаторлық жасаған «Ұрпақтар сабақтастығы» жобасының оқу жылы бойында жемісті жүзеге асырылуынан алған әсерім бүгін қолға қалам алуыма түрткі болды.

2019-2020 оқу жылынан бастап Назарбаев Зияткерлік мектептерінде аймақтағы жалғызілікті қарияларды мектеп қамқорлығына ала отырып жұмыс жасайтын «Ұрпақтар сабақтастығы» жобасы қолға алынды.

Бұл өнегелі істердің бастамасы саналатын жобаны жүзеге асыру үрдісінен қалыс қалмай, Тараз қаласындағы «физика-математикалық бағыттағы Назарбаев Зияткерлік мектебінде» де жоба жұмысының жыл бойы үздіксіз жүргізілуіне қолайлы жағдай жасалды. Аймақтағы жалғызілікті қарияларымыздың мектеп оқушыларымен етене араласып, түрлі шараларға қатысуына қолдау көрсетілді.

Бекітілген жылдық жұмыс жоспарына сәйкес өтілген барлық іс-шараларға қариялар мүмкіндігінше көптеп қатыстырылды.

Әрине, мүмкіндік болса біреудің біреуге кіріптар болмағаны жақсы, дегенмен қоғамда қолдауды қажет ететін әлеуметтік топтар баршылық.