Жақсы мінез – адамның өмірлік байлығы туралы мақала

Жақсы мінез-бүкіл өміріңнің сарқылмас байлығы

Адам табиғатынан мінсіз жаратылады. Бірақ сол жаратылысқа шынайы мән мен терең мағына беретін – оның мінезі. «Жақсы мінез – бүкіл өміріңнің сарқылмас байлығы» деген сөз жай ғана көркем тіркес емес. Бұл – адамның бүкіл ғұмырын жарық етіп, оған рухани қорек беретін шындық. Бұл – көзге көрінбейтін, алайда жанның шуағы ретінде өмірдің әр белесінде жарқырап көрінетін қасиет.

Мінез – адамның ішкі дүниесінің, болмысының көрінісі. Оны ұстап та, сатып та ала алмайсың. Мінез – өсіп келе жатқан ортада, тәлім-тәрбие мен өмірлік тәжірибе арқылы қалыптасатын рухани әлемнің негізі. Жақсы мінез – бұл шыншыл болу, мейірімді болу, кешіре білу, әділетті болу, сабырлы болу. Бұл – қарапайым болып көрінгенімен, адамды биікке шығаратын қасиеттер жиынтығы.Кез келген адам өзінің келбетін күтіп, сыртқы сұлулығына назар аударады. Бірақ француз жазушысы В. Гюго: «Сыртқы сұлулық толық болу үшін ішкі сұлулықпен жандануы керек» деген. Шынында да, жүзіндегі күлкі шынайы емес, көзіңдегі мейірім жасанды болса – ең көркем келбет те өз мәнін жоғалтады. Ал ішкі әлемі бай, жүрегі таза адам қандай кейіпте болса да – ол өзгелерге тартымды, жылы әсер қалдырады. Себебі шынайы сұлулық – мінезде жатыр.

Қоғамда қалыптасқан кейбір түсініктер – жақсы мінезді әлсіздікпен шатастырады. «Жұмсақ болма – таптайды», «көпке жаққан – көмусіз қалады» деген сыңайлы тұжырымдар адамның адамгершілігін басып, қатігездікке итермелеуі мүмкін. Бірақ шыны керек, бүгінгі қоғамға жетпейтіні – дәл осы жан жылуы, жақсы мінез. Қарапайым сәлемдесу, кешірім сұрау, алғыс айту, жақыныңа жанашырлық таныту – бәрі-бәрі мінездің көрінісі. Мұндай істерді әлсіз адам емес, жүрегі кең, рухы биік тұлғалар ғана жасай алады.

Жақсы мінез – адамның абыройын асқақтататын қасиет. Байлық пен мансап уақытша. Бүгін бар, ертең жоқ. Бірақ мінезі көркем адам – қай ортада жүрсе де, қадірлі болмақ. Жақсы мінез адамды табысты етеді. Бұл ғылыми тұрғыда да дәлелденген. Көптеген жұмыс берушілер біліктілікпен қатар адамның мінез-құлқына да мән береді. Командалық жұмысқа бейім бе? Қиындыққа сабырмен қарай ма?…