Жастардың мамандық таңдауындағы қателіктері 11 сынып

Жастардың мамандық таңдауы

Қазір жастар үшін ең маңызды шешімдердің бірі — мамандық таңдау. Бұл шешім өміріміздің болашағына тікелей әсер етеді. Бірақ бұл таңдауды жасау оңай емес. Кейбір оқушылар нақты не ұнайтынын білмейді, ал кейбіреулер ата-анасының айтқан жолымен жүріп кетеді.

Біреулер дәрігер болғысы келеді, біреулер мұғалім, ал енді бірі ІТ саласына қызығады. Бірақ бәрімізге ортақ сұрақ — «Осы мамандық маған шынымен ұнай ма?» Жай ғана «ақша табу үшін» таңдалған мамандық адамды бақытты ете ме? Жоқ. Себебі адам өзіне ұнайтын іспен айналысқанда ғана шын бақытты болады.

Мамандық таңдағанда ата-ананың, мұғалімнің, достардың пікірі маңызды. Бірақ ең бастысы — өз жүрегіңнің не қалайтынын түсіну. Мысалы, біреу сурет салғанды жақсы көреді, бірақ “суретші болмай ақша таппайсың” деген сөздерден кейін мүлде басқа саланы таңдайды. Уақыт өте келе ол адам бұл таңдауға өкінуі мүмкін. Тағы бір қиындық — қоғамдағы пікірлер. Кейбір мамандықтар «беделді», ал кейбіреулерін «арзан жұмыс» деп ойлайды. Бұл да жастарға қысым жасайды. Алайда әр мамандықтың өз орны бар. Қарапайым жұмыс істейтін адам да қоғамға пайдалы.

Кейде оқушылар грант үшін ғана бір мамандықты таңдай салады. Бірақ оқуға түскеннен кейін «маған бұл мүлде ұнамайды екен» деп, қайтадан басқа жол іздейді. Бұл да уақытың мен күшіңнің босқа кетуіне әкеледі.

Менің ойымша, мамандық таңдау — адамның өз болашағына деген жауапкершілігі. Өз арманыңды тыңдап, не істегенде өзіңді бақытты сезінетініңді түсінген дұрыс. Қазір заман өзгеріп жатыр. Бұрын тек дәрігер мен мұғалім болу маңызды болса, қазір дизайнер, фотограф, SMM маманы сияқты жаңа салалар да танымал. Ең бастысы — өз ісіңді сүйіп, соны жақсы көру.

Қорытындылай келе, әр жас мамандық таңдағанда біреудің емес, өзінің жүрегінің үнін тыңдауы керек. Адам өз орнын тапқанда ғана шын мәнінде дамиды, арманына жетеді. Ал мамандық — жай жұмыс емес, өміріңнің маңызды бөлігі.