Жастардың рухани кеңістігі туралы әлеуметтік мақала

Рухани кеңістіктің босап бара жатқаны – дабыл қағарлық жағдай

Қазіргі жаһандану дәуірінде адамзаттың ақпараттық кеңістігі кеңейді. Бұл – прогресс. Алайда кез келген прогрестің көлеңкелі тұстары болатыны да рас. Бүгінгі таңда қоғам үшін аса өзекті мәселелердің бірі – жастардың әлеуметтік желіге тәуелділігі мен соның салдарынан туындаған рухани жұтаңдық.

Бүгінгі жастар – елдің ертеңі. Бірақ осы ұрпақтың ой-санасы күн сайын TikTok, Instagram, YouTube секілді платформаларға тәуелді бола бастағаны – ұлт болашағына төнген үнсіз қауіп.

Ақпарат көп, мағына аз

Интернет – шексіз білімнің көзі бола алатын үлкен алаң. Бірақ оны кім қалай пайдаланып отыр? Сан түрлі видео, тренд, челендждердің арасынан өскелең ұрпақ не үйреніп жүр? Өкінішке қарай, қазіргі таңда жастардың басым көпшілігі уақытын бос әрі мазмұнсыз ақпараттармен өткізуде. Бұл – тек уақыт жоғалту ғана емес, сананың улануы.Рухани даму тоқтаған жерде ақыл тоқырайды, жүрек қатаяды. Жастардың кітап оқуға, терең ойлауға құлқы төмендеп, бір минуттық видеолармен өмір сүру үрдіске айналуда.

Жаһандық дерт – жалғыздық пен күйзеліс

Әлеуметтік желі – жалған идеалдардың отаны. Түрлі «перфект» өмірлер, сұлулық стандарттары, байлықтың көрсетілімдері – жастарда шынайы өмірге деген наразылық тудырады. Соның салдарынан өзін-өзі бағаламау, күйзеліске ұшырау, тіпті психологиялық дағдарысқа тап болу секілді күрделі проблемалар орын алуда.

Психологтардың айтуынша, әлеуметтік желіде көп уақыт отыратын жастардың эмоционалдық тұрақтылығы әлсірейді, өзін жалғыз сезіну, өмірге қызығушылықтың жоғалуы, шынайы қарым-қатынастан қашу жағдайлары көбейген.

Тамырынан ажыраған ұрпақ – рухани апаттың бастамасы

Тағы бір алаңдатарлық жайт – ұлттық құндылықтардан алшақтау. Желідегі шетелдік контенттер жастардың дүниетанымын өзгертуде. Қазақы мінез, ұлттық болмыс, ана тілі, үлкенге құрмет секілді асыл қасиеттер – трендке айналмайтын, бірақ ұлтты сақтап қалатын киелі ұғымдар. Өкінішке қарай, бұл қасиеттер жастар арасында өзектілігін жоғалтып бара жатқандай.

Бүгінгі таңда кейбір жастар қазақтың белгілі тұлғаларын емес, өзге елдің блогерлерін, әншілерін пір тұтып жүр. Бұл – мәдени құлдықтың алғашқы белгісі. Ал мұның түбі – ұлттық тамырдан ажырау.

Статистика не дейді?