Жастарға ғылыми серпін берген әл-Фараби форумы туралы мақала

Жастарға ғылыми серпін берген Халықаралық Фараби форум

Әл-Фараби атындағы Қазақ ұлттық университетінде ұдайы өткізілетін өте ауқымды ғылыми іс-шаралар бүгінгі жастар үшін үлкен мүмкіндіктер тудырып отырғандығы белгілі. Университет бастамасымен ұйымдастырылатын дәстүрлі Халықаралық Фараби форумы әртүрлі елдердің үлкен ғалымдарының ғылыми ізденістерін танып, жас ұрпақтың соларға еліктей отырып, алғашқы зерттеулер жасап көруіне себеп болып көмектеседі.

Жеке тәжірибемнен айтар болсам, осындай үлкен ғылыми форумға мақала ұсынуды бұрын ойламаған едім. Бірақ, ұлттық университетте оқитын болғандықтан, ғылыми жетекшім Мира Балтымова ұстаздың бастамасымен мақала жазуды қолға алдық. Жетекшімнің кеңесімен жазылған мақалалар конференция жинақтарына тапсырылды. Мақалалар үлкен ғалымдардың еңбектерімен қатар жинақта басылып шыққанда, жазылған еңбегін көрген студент немесе магистрантты ерекше қуаныш тербейді. Бұл Форумнан алынған бірінші пайда.

Форумға көрермен немесе спикер ретінде қатысып, баяндама қорғаудың жөні және бір бөлек. Белгілі ғалымдардың баяндама жасаған кезде айтқан ерекше идеяларына мән беріп отырған кезде, келесі мақалаларға идеялар келе бастайды. Кейде, мақаланың мәйегін берген маманның сөзінен кейін, жаңа бағытта зерттеу жасауға ынта пайда болады. Сонымен қатар, баяндама жасау барысында берілетін регламент ғылыми өмірде болатын заңдылықтарға тәрбиелейді. Себебі, ғылым әдебиет сияқты мәнерлеп, созып сөйлейтін стильде емес. Ғылымда тоқсан ауыз сөздің тобықтай түйіні айтылып, мәселенің мәйегі тыңдаушыға ұсынылуы керек. Конференциялардағы регламентке сай сөйлеу осындай жоғарғы деңгейде сөйлей алатын маман болып қалыптасуға себеп болады. Мысалы, қорғауға дайындалған сәтте, регламентке сай сөйлеу үшін ең маңызды мәліметтерді қамтыған презентация дайындадым. Презентацияда ұзақ мақаладағы ең маңызды мәліметтерді сүзіп алып, шығарылған қорытындыны қамтуға ұмтылдым.

Мұндай ғылыми конференциялар әрдайым мәнді болып қала бермек. Уақыт өткен сайын, форматы да өзгеріп, жаңаша бағыттарға көшеді деп ойлаймын. Конференция жинағында да түрлі тақырыптарда мақалалар жарық көріп, ондаған бағыттар қарастырылады. Осындай үлкен ғылыми байланыстарға себеп болып, ғылыми орта қалыптастыру Әл-Фараби атындағы Қазақ ұлттық университетінің жетістіктерінің бір парасы ғана. Осынау оқу ордасында білім алу – зор мақтаныш! Бүгінгі заман – білімнің заманы!

https://kaznu.kz