Жазба жұмыстар жиынтығы 4 сыныпқа арналған жинақ

Мерзімі: 11.09. 2016 Пән: Әдебиеттік оқу 4 сынып

Тақырыбы: Мазмұндама «Құмырсқалар»

Мақсаты: Мазмұндама жазу дағдыларын қалыптастыру, жеке тұлғаның қалыптасуы мен дамуына мүмкіндік жасау.

Міндеттері:

1.Сауатты жазу дағдыларын қалыптастыру; мәтін туралы түсініктерін қалыптастыру;

«Құмырсқалар»

Шәріп атаның бір құмыра балы болатын. Ол сарайда тұрды. Бір күні балын құмырсқалар жеп жатқанын көреді. Қараса, сарайда құмырсқаның илеуі бар екен. Құмырсқаның илеуін құрту өте қиын. Илеудегі құмырсқа өте көп. Ата ойланып қалды. Шәріп ата айла ойлап табады. Ол қыш құмыраны сыртынан шандып байлап, сарайдың төбесіне іліп қойды. Құмыраның ішінде бір құмырсқа қалып қойыпты. Құмырсқа илеуіне жол іздейді. Ол алдымен жіпке, одан төбеге өрмелейді. Төбеден қабырғаға одан еденге түседі. Бір күні атай өрмелеп жүрген құмырсқаларды көреді. Олар құмыраға кіріп – шығып жатыр. Құмыраны қараса, бәрін жеп қойыпты.

Мазмұндама жоспары:

1 Шәріп атайдың балы

2. Сарайдағы құмырсқаның илеуі, балды жеуі.

3. Атайдың айласы

4. Бір құмырсқаның әрекеті

Түсіндірілетін сөздер мен сөз тіркесі: илеуі, шыңдап байлап

Үйге тапсырма: қайталау

Мерзімі: 05.05.2016.

Пән: Әдебиеттік оқу 4 сынып

Тақырыбы: Мазмұндама «Бұлақ басындағы оқиға»

Мақсаты: - жоспар бойынша мәтін мазмұнын рет-ретімен дұрыс баяндап жазуға төсілдіру, мейірімділікке, қамқорлыққа баулу.

Міндеттері: - Сауатты жазу дағдыларын қалыптастыру; мәтін туралы түсініктерін қалыптастыру;

Бұлақ басындағы оқиға.

Біз жазда малды ауылда жайлауда болдық. Бір күні папам, сіңілім Жанар үшеуіміз қой тоғытуға үлкен бұлаққа бардық. Бұлақтың жан-жағы көк майса шөп. Қойды тоғытып болып, үйге қайтып келе жатқанбыз. Кенет ешкінің бақылдағаны естілді. Дыбысы аянышты шығады. Алғаш онша мән бермеген едік. Бірақ ешкі маңырауын қоймады. Дыбыс шыққан жаққа қарай жүрдік. Байқасақ, бір лақ бақпаққа батып, тұра алмай талпынып жатыр. Папам екеуіміз лақты ұйықтан шығарып алдық. Үсті-басы батпақ-батпақ болыпты. Оны бұлақтың суымен жуып тазарттық. Біз Жанар екеуіміз лақты өлімнен құтқарғанымызға қатты қуандық.

Түсіндірілетін сөздер мен сөз тіркестері: қой тоғытуға, көк майса, батпаққа батып, талпынып жатыр, ұйықтан шығарып алдық.

Мазмұндама жоспары:

1. Жайлауға бару.

2. Ешкінің бақылдаған дауысы.

3. Құтқарылған ешкі

4. Қыздардың қуанышы

Мерзімі:13. 05. 2016.

Пән: Әдебиеттік оқу 4 сынып

Тақырыбы: Мазмұндама «Алтын адам»

Мақсаты: жоспар бойынша мәтін мазмұныны, түсінгенін сауатты жазуға үйрету; сөздік қорын дамыту;

Алтын адам.

Балалар мұражайларды аралап, көп қызықтады, әсіресе археология мұражайына жасалған экскурсия оларға қатты ұнады. Мұражайдағы экспонаттар қазіргі Қазақстан жерінде ерте замандарда қандай тайпалар мекендегенін білдіреді. Археологтар табылған еңбек құралдары, ыдыстар, әшекей бұйымдарға қарап біздің ата-бабаларымыз қалай өмір сүріп, немен шұғылданғандарын анықтап отыр. Балалар бір экспонаттың жанынан көпке дейін кетпеді. Онда жас ханзада – сақ жауынгерінің бастан-аяқ киімі қойылған. Оның дулығасы мен кіреуке сауытын көне зергер аңдардың, құстардың, ағаштардың, таулардың суретін бейнелеп жасаған алтын табақ -шалармен әшекейленген. Осы жауынгер киімі Есік қорғанында екі мың жылдан астам уақыт жатса да, күні бүгінге дейін жақсы сақталған.

Түсіндірілетін сөздер мен сөз тіркестері: археология мұражайы, экспонаттар, тайпалар жас ханзада-сақ жауынгері, әдіптелген, дулығасы, кіреуке сауытын, көне зергер, Есік қорғаны.

Мазмұндама жоспары:

1. Археология мұражайына жасалған экскурсия

2. Ежелгі ыдыстар мен бұйымдар

3. Ханзаданың киімі

4. Есік қорғанында сақталуы

Мерзімі: 20. 04. 2016.

Пән: Әдебиеттік оқу 4 сынып

Тақырыбы: Мазмұндама «Атамекен»

Мақсаты: жоспар бойынша мәтін мазмұныны, түсінгенін сауатты жазуға үйрету; сөздік қорын дамыту;

Атамекен.

Түн. Мен далада сәкі үстінде жатырмын. Аспанда жұлдыздар жымыңдайды. Жұлдыздар арасында ай. Дала сүттей жарық. Тау жақтан салқын леп соғады. Жым – жырт тыныштық. Мен ояу жатырмын. Ұйқым келер емес. Қандай сүйкімді көрініс. Табиғат бір мезгіл тыныс алғандай. Тілмен айтып жеткізудің өзі қиын. Тіпті суретшілер де дәл осындай көріністі көз алдына келтіре алмас. Тек табиғаттың ғана қолынан келетіндей.Ауылыңнан алыс жаққа шықсаң, қайтып келуге асығасың. Келсең, таныс көшелер, үйлер, адамдар – бәрі көзіңе оттай басылады.

Түсіндірілетін сөздер мен сөз тіркестері: Сәкі, сүттей жарық, жым-жырт

Мазмұндама жоспары:

1. Аспандағы жұлдыздар

2. Әсем көрініс

3. Табиғаттың шеберлігі