Желтоқсан мерекесіне арналған тәуелсіздік мақаласы

Желтоқсан-Тәуелсіздікке бастаған күн

Бұл күндері Қазақстан өзінің ең басты мейрамы-Тәуелсіздік күнін атап өтуде. Бұл мереке-қазақ халқы үшін ұлы мереке. Қазақтың ежелден ең асыл мұраты, арманы-еңселі ел болу еді. Елім, жерім деп еңіреген ақындарымыз: «Егемен болмай ел болмас, етектен кесіп жең болмас»- деп жырлайтын еді. Қазақ жерінде атқан Тәуелсіздік таңы-кең даламыздың мына дархан төсін қанымен, терімен суарған ата-бабаларымыздың қасиетті күресінің заңды жемісі, нақты нәтижесі дейміз.

Желтоқсан оқиғасы –халқымыздың бастан кешкен тарихының бір кезеңі. Ол тарихта мәңгі қалады, ешқашан да ұмытылмайды.

1986 жылы 16 желтоқсан күні өрімдей жастар азаттық үшін, тәуелсіз ел үшін өз бастарын құрбан етті. Сол кезде олардың ерлігі-батырлықтың ерлігі.

Мен ол уақытта Алматы қаласындағы Абай атындағы Қазақтың педагогикалық институтының ІV курс студенті болатынмын. 1986 жылдың 16, 17 желтоқсанында Алматыдағы сол кездегі Брежнев алаңына мыңдаған адам жиналды. Олар Дінмұхамед Қонаевтың қызметтен кетуіне байланысты наразылық білдіріп, бірінші хатшылыққа жаңадан келген Колбиннің орнына қазақ азаматын тағайындауды талап етті.

Алматының барлық оқу орындарының студенттері, жұмысшылары алаңға жиналды. Негізінде алаңға бейбіт жастар шықты. Жастардың санасында күш көрсетеміз деген ой болған жоқ. Ел мен ұлттың тәуелсіздік құқын қорғау үшін бас көтерген желтоқсандық жігіттер мен қыздардың бұл қадамы шын мәнінде ерлік еді. Осы бір көрініс менің көз алдымда мәңгі бақи сақталып қалды. Ол ар-намыс пен елдік рух жолында теңдікті талап еткен тегеурінді күш-қайнарының тоғысқан шағы еді. Қазақ елінің тарихында осы бір ұлы оқиға ешқашан ұмытылмақ емес. Біздің жоғалтқанымыз, ең асылымыз-еркіндік, тәуелсіздік еді. Бұл-қазақ халқының тарихында ерекше орын алатын оқиға. Қазақ халқы өзінің тәуелсіздігі үшін, мемлекеттілігі үшін қай заманда болсын, қозғалысын еш уақытта тоқтатпаған. Егемендікке жетудің жолында жасалған көп қадамның бірі-Желтоқсан оқиғасы. Жапа шеккендер-жазықсыз жастар қауымы. Кеңес билігі жастарды алаңнан күштеп қуды. 1986 жылғы 16,17 желтоқсандағы Брежнев алаңындағы қазақ жастарының бейбіт шеруі қанды оқиғаға айналды. Оларға «Ұлтшыл, маскүнем» деген кінә тағылды. 1986 жылы желтоқсанның мұзға жаққан алауы 1991 жылы 16 желтоқсанда тәуелсіздік таңын тудырды.