Жоғары оқу орындарындағы исламтану мамандығы мақаласы

Жоғары оқу орындарында «Исламтану» мамандығының оқылуының маңыздығы

Қазіргі уақытта елімізде жоғары оқу орындарындағы мамандық саны жыл сайын өсіп, түрленіп және дамып келеді. Қай салада болмасын оның әртүрлі тармақты мамандықтары пайда болып, оқу жүйесіне енгізілуде. Мәселен психология саласын алып қарастыратын болсақ, қазіргі уақытта оның балалар психологиясы, клиникалық психология, жалпы психология деген секілді көптеген тармақты салаларында студенттер түсіп, өз білімдерін шыңдап жатыр.

Осы секілді күнімізде ЖОО-ларға еніп жатқан мамандықтардың бірі – Исламтану. Қазақстандағы жоғары оқу орындарындағы Исламтану мамандығы Ислам діні жайлы жалпы базалық білімді ұсынады. Бұл саладағы бағдарлама білім алушыларға Ислам теологиясын, оның құқықтық-заңнамалық жүйесін, діннің қайнаркөзі болып саналатын Құран мен хадисті, олардың түсіндірмесі болып саналатын тармақты салаларды, сонымен қатар, осы салалардың қалыптасуында пайда болған әдіснамалық жүйені үйретеді.

Белгілі болғандай, қазіргі кезде, Ислам дінінде әртүрлі себепке байланысты көптеген бағыттары бар. Оларға «мәзһаб» деген термин берілген. Мемлекетімізде Исламның сунниттік бағыты бойынша қалыптасқан екі сенім мектебінің бірі Матуриди сенімі негізгі болып саналады. Сол секілді, құқықтық жүйедегі сунниттік бағыт бойынша қалыптасқан төрт мәзһабтың бірі Ханафи мәзһабы ресми сипатқа ие. Сол себепті, жоғарғы оқу орындарындағы Исламтану мамандықтары осы бағыттар бойынша білім береді.

Осы тұрғыдан қарастырғанда, Исламтану мамандығы кез-келген елде, әсіресе қазіргі жағдайда Қазақстанда үлкен маңызға ие. Себебі еліміздегі діни ахуал сыртқы және ішке мәселелерге байланысты өте төмен деңгей әрі қауіпті деңгейде екені мәлім. Сондықтанда қазақ халқының бұрыннан қалыптасып, қазірге дейін келе жатқан дәстүрлі әрі дұрыс сенімін сақтап, елімізде саяси, әлеуметтің және діни тыныштық орнауы үшін Исламтану мамандығы бойынша білікті мамандарды дайындау қажет.

Осы мақсатты алға қоя отырып, Әл-Фараби атындағы Қазақ ұлттық университетінде 2015 жылдан бері Исламтану мамандығы ашылып, «исламтанушы» студенттерді дайындап келеді.

Әл-Фараби атындағы Қазақ ұлттық университеті, Философия және саясаттану факультеті, Дінтану және мәдениеттану кафедрасы, «Исламтану» мамандығының

1-курс магистранты: Жанысбаев Р.М.

Ғылыми жетекшісі: Аманқұл Т.О.

www.kaznu.edu.kz , https://farabi.university/