Жылы жүрек, жақсы тілек коучинг жоспары

Коучинг

Тақырыбы : Жылы жүрек - жақсы тілек

Мақсаты: Оқушылардың психологиялық көңіл- күйлерін көтеру, өздеріне құрметпен қарауға баулу, сыныпта сыйластық қарым-қатынас орнату, өз ойларын еркін жеткізе білуге дағдыландыру.

Көрнекілігі: түсті қағаздан қиылған гүлдер,ақ қағаз,қалам,нақыл сөздер жазылған плакаттар.

Жүргізілу барысы:

1. Ұйымдастыру.

2. Шаттық шеңбері "Сені көргеніме қуаныштымын. Себебі..."

3. Топтастыру.

4. Ертегі терапиясы: "Жүзіктегі жазулар"

5. Ойын жаттығу: "Молекула"

6. Қорытындылау. "Жүректен жүрекке"

Тренингімізді бастау үшін өз еркімен қатысамын деушілер ортадан орын алсын.

1. Шаттық шеңбері "Сені көргеніме қуаныштымын. Себебі..."

2.Топтастыру: Балалар, өздеріңнің туылған жыл мезгілдеріңе сай топтаса қойыңдар.

Қыс мезгілінде туылғандар шыдамды әрі жігерлі келеді. Әрқашан көмектесуге дайын. Еркіндікті сүйеді. Қай салада болсын биіктен көрінгенді қалайды.

Күз мезгілінде туылғандардың есте сақтау қабілеті мықты. Сыйлық бергенді ұнатады. Тәуелсіз болғанды жақсы көреді. Өте принципшіл жандар.

Жаз мезгілінде туылғандар өте сезімтал. Табиғи дарынды, алғыр және мейірімді. Істеген істеріне сергектікпен, байыппен қарайды.(Әр топ өздері ақылдасып топтарының атын қояды.)

Ертегі терапиясы: "Жүзіктегі жазулар". Баяғыда бір хан болыпты. Оның перзенті болмапты. Хан қартайып,ө лер шағына жеткен соң:

- Мен өлгеннен кейін, менің ауламның есігін бірінші болып ашқан адам менің орныма хан болсын, - дейді уәзірлеріне. Хан өлген соң уәзірлері қақпа алдында тұрса, бірінші болып қақпаның есігін бір диуана ашыпты. Ханды жерлегеннен кейін диуананы хан етіп сайлайды. Басқа диуаналар оны көре алмайды да:

- Сендер мені күндемей-ақ қойыңдар. Менің өмірімнен сендердің әмірлерің жақсы. Сендер өз пайдаларыңды өздеріңе жұмсайсыңдар, өз бастарыңды ойлайсыңдар. Ал мен болсам, халқымды ойлаймын, халқым үшін қызмет етемін ,-дейді.

Осы сөзді айтып хан диуаналарды шығарып салады. Арада біраз уақыт өтеді. Хан диуаналарды ұмытып та кетеді. Ханға қапа болған диуаналар жиналып әңгімелеседі. Сонда бір диуана тұрып:

- Бұл хан бізді менсінбей барады. Біз былай істелік, барлық жиған ақшамызды қосып, бес күміс жүзік істелік. Сол жүзіктердің бетіне бес түрлі өсиет жаздырып, ханға сыйлайық. Сосын патша уәзірлеріне сөйлеген кезде, сол өсиеттерді оқып, мен-менсімейтін болады,- дейді.