Адал жол туралы эссе 5 сынып оқушыларына

Мардан Байділдаев атындағы

№232 орта мектептің 5 «б» сынып оқушысы Қоныс Бекжанның

«Адал жол» атты

эссе жұмысы

«Адал жол» эссе

Адалдық адам мінезіндегі бағалы қасиет. Қарапайым халық әрқашан да адалдық қасиеттерін кіршіксіз таза ұстайды.

Адалдық – адам бойындағы таза ниет, бағалы қасиет, адамның сана-сезімі, ар-ожданы деп ойлаймын.

Қазақтың адалдық жайында өзіндік пайым-түсінігі туралы Ұлы Абай: «Алдау қоспай, адал еңбегін сатқан, қолы өнерлі қазақтың әулиесі сол» - деді.

Шәкәрім қажы адалдық турасында «Мақтан үшін мал жима, жан үшін жи», - деп бақыттың өзі адалдыққа негізделгенін айта келіп, адалдықтың арына көңіл бөледі. Асыл қасиеттердің бірлікте болуын ашып көрсетеді.

Қазақстан Республикасының Президенті Н.Ә.Назарбаевтың «Қазақстан жолы 2050: маңызды міндет – сыбайлас жемқорлыққа қарсы стратегияны қалыптастыру және оны іске асыруды жалғастыру» деп атап көрсетуі еліміздің әрбір азаматына жауапкершілікті жүктей отырып, бүкіл қоғамның күш жігерін жемқорлыққа ымырасыз қарсы тұруға, оның пайда болу себептерін жоюға бағыттайды. Сонымен бірге еліміздің болашағы біз – жастар патриоттық сезімде, адал еңбек етуге, біреудің еңбегін пайдаланбауға осы бастан өзімізді тәрбиелеуіміз қажет деп ойлаймын.

Газет, журналдардан сыбайлас жемқорлық туралы мақалаларға көзім түсіп оқитын кездерім де болады. Сыбайлас жемқорлық деген сөзді үнемі естіп, теледидар, газет, беттерінен көріп жүргендіктен, оған құлағымыз да етіміз де үйреніп қалғандай. Қазіргі таңда біздің қоғамымызды жаулаған бір індет болып тұр. Адамдардың осындай жайттарды көре тұрып, сенімдері жоғалғандығын байқаймыз.Үлкендеріміз әділдік шындық деген нәрсеге сенбейтіндей, сенімсіздікпен қарайтындай жағдайға жеткен.

Мұның себебі неде? – деген ой туындайды.

Жас мемлекет болсақ та бұл індет бізді айналып өтпеді. Жемқорлық ол індет сияқты.

Қазіргі таңда адамдар рухани игіліктен материалдық игілікті алға қоятын сияқты. Осының салдарынан қоғамда алға жылжу, өсу болмайды деп ойлаймын. Ол жәй құқық бұзушылық емес мемлекетіміздің сенімділігі мен ұлтымыздың қауіпсіздігіне төнген қауіп-қатер деп ойлаймын. Бұл мемлекетіміздің өсуіне, дамыған мемлекеттердің алдағы қатарынан көрінуге кедергісін келтіреді.

Сондықтан да біз жеткіншектер – Отанға деген сүйіспеншілікке, адамдарды дәстүрлі құрметтеуге, білім мен еңбекке ұмтылуға, көрегенділік пен адалдыққа ұмтылуымыз қажет…