Адамгершілік асыл қасиет туралы мақала

АДАМГЕРШІЛІК-АСЫЛ ҚАСИЕТ

Бұл өмірде ең үлкен асыл қасиеттердің бірі – адамгершілік. Адамның бойында әртүрлі қасиеттер бар тек осы адамгершілік қасиеті біраз адамда жоқ. Кейде адаммен қалай сөйлесуді ұмытып кетеміз.

Жақында бір көрініске куә болдым. Күн ыстық, далада адамдар өте көп. Маңдайдан тер су сияқты ағып барады. Шаршағанымды баспақшы болып, аздап демалмақ оймен орындыққа отырдым. Қарама-қарсы жағымда киімі жыртық, үсті-басы кір, елден ақша сұрап отырған кісіге назар аудардым. Әлгі адамға ешкім көмек қолын созғысы келмеді тіптен – «Әрі отыр, кедергі жасама саудаға» деген саудагерлерді көрдім. Алайда адамгершілігі мол адамдар да бұл әлемде бар. Кішкентай ұлымен анасы сол адамның жанынан өтіп бара жатты: «Анашым, бағана маған алған бәліш қайда?», – деп сұрады бала. «Оны үйге барған соң да жейсің, балам» дегенге көнбей әлгі бала кетпей тұрып алды. Анасы амал жоқ сөмкеден бәлішті алып, баланың қолына ұстатты. Бәлішті ала сала кішкене ғана бүлдіршін, ақша сұрап отырған кісіге апарып беріп: Осыны жеп алыңыз, – деді. Әлгі адамның көзіндегі ризашылықты ауызбен суреттеп жеткізу мүмкін емес. Анасы да баласына риза болды.

Кішкентай кезден бастап айналасындағы әр адамды бөліп-жармай тең қарауды, қажет болса қолғабыс көрсетуді бойына сіңіріп өскен әр бала, өскенде де өзінің адамгершілік қасиетін ұмытпайды.

Өмірде қандай жағдай болса да, адамгершілік қасиеттерімізді ешқашан өзімізден жоғалтпайық! Бұл дүние есігін ашқаннан кейін жақсылық жасап, басқа мұқтаж адамдарға қол ұшын созып, тек жақсы ниеттермен өзгеге үлгі болайық!

Абылай хан атындағы

Қазақ Халықаралық Қатынастар және

Әлем Тілдер Университетінің

2-курс студенті

Турганбаева Диана