Алтын күз мерекелік ертеңгілігіне арналған сценарий

«Алтын күз!» мерекелік ертеңгілігінің сценарийі.

Мақсаты: Балаларды күз мезігілі, табиғат құбылыстарымен таныстыру, күз көріністерін музыка тілімен ұғына білуге баулу. Әннің әуеніне қосылып айту, әннің мәтініне және бидің сюжеті бойынша ырғақтық – қимылдарды, биді орындау, шығармашылық қабілеттерін дамыту. Балаларды табиғатты сүюге тәрбиелеу, көпшіліктің алдында өнерлерін көрсетуге тәрбиелеу.

Кейіпкерлер: Күз ханшайымы, Қоян.

Жүргізуші: - Армысыздар, құрметті ата - аналар мен ардақты қонақтар! Бүгінгі «Алтын күз» мерекелік ертеңгілігіне қош келдіңіздер!

(Музыка әуенімен бүлдіршіндеріміз залға келіп жарты шеңберге тұрады.)

Жүргізуші: - Сары жібек көйлегін желбіретіп,

Жапырағын ағаштың селдіретіп.

Тойға бөлеп елімді күзім келді,

Нұр тамшысын аспанның мөлдіретіп. Балалар, қазір жылдың қай мезгілі?

Балалардың жауабы: - Күз мезгілі.

Жүргізуші: - Дұрыс айтасыңдар, балалар, бұл күз мезгілінде болады екен. Күз айналаға көрік беріп, жан-жағын сары алтынға бояп құлпыртып, құбылта білетін жыл мезгілінің бірі. Ендеше осы әдемі де, көрікті күзді әнге қосып, жырлайық.

Бүлдіршіндердің орындауында «Күз ырғағы» әнін қабыл алыңыздар!

Ән: «Күз ырғағы» (Сөзі: И.Сапарбаев; Әні: Д.Ботбаев) (С.Ғ.Бәтібаева «Бөбектерге ән базарлық» құралы Алматы- 2009, 85-бет фортепианода ойнап сүйемелдеу)

1.Жеміс-жидек пісіп жатыр,

Түсіп жатыр бау-бақта.

Жапырақтар ұшып жатыр,

Ұшып жатыр жан-жаққа.

2.Жапырақтың сарғайғаны-

Келген күздің сәні ме?

Қайтқан құстың шалғайдағы

Әлде мұңлы әні ме?

Жүргізуші: - Балалар, бізге қонаққа Күз ханшайымы келемін деп еді, енді мерекеміз қызықты өту үшін ортамызға Күз ханшайымын шақырайық!

Балалардың барлығы: - Келші, келші алтын күз, келші, келші жарқын күз!

Мерекені жалғастырып, ойнап, күлші алтын күз!

(Балалар Күз ханшайымын қол соғып қарсы алады. «Күз» Вивальди музыка үзіндісімен ішке сары киім киген Күз ханшайымы қолындағы алмалармен кіріп келеді).

Күз ханшайымы: Алтын түске боялды,

Тау мен қырда, дала, түз.

Келдім міне ортаңа,

Менің атым Алтын күз!

- Сәлеметсіздер ме, қонақтар! Cәлеметсіңдер ме, балалар!

Балалар: - Сәлеметсізбе!

Күз ханшайымы: Мен Күз ханшайымы боламын, сендердің күз мерекелеріңе қонаққа келдім. Қараңдаршы, айналаның бәрін алтын түске бояп та қойдым. Қандай тамаша! Барлығы сары түске боялған.

Жүргізуші: - Қош келдің, Күз ханшайымы. Өзіңмен бірге береке, байлық, молшылық, тоқшылық ала келдің. Оған біз өте қуаныштымыз. Мына сыйды балаларға таратып берсек бола ма?

Күз ханшайымы: - Жоқ, бұл сыйды балалар еңбек етіп, тер төгіп, өнерлерін көрсетіп, алулары қажет. Өйткені күздің сыйлары тек адамның еңбегінің арқасында болады.

Жүргізуші: Олай болса Күз ханшайымы, біздің балалар саған арнап күз мезгілі туралы тақпақ айтып береді, тамашала.

Тақпақтар:

1.Берекесін сыйлауға,

Өлкемізге күз келді.

Жемістерін жинауға,

Шақырады біздерді.

2.Жемісі мол теретін,

Күз дос екен бізбенен.

Бәрін тауып беретін,

Жомарт екен күз деген.

3.Жайдарлы күз, жарқын күз,

Аяулы күз алтын күз.

Дәнге толы кең далам,

Сары алтын айналам.

4.Қамба толды астыққа,

Алғыс саған алтын күз.

Бір уыс дән шаштықта,

Қап-қап бидай алдық біз.

5.Ақтарады мырза күз,

Уылжыған жемісін.

Күзге бізде ризамыз,

Аянбаған ел үшін.

6.Алқаптан бидайды

Қоймаға ел жинайды.

Тырнасы тізілген,

Ұнатамын күзді мен.

7.Астық, жеміс жиналды,

Қамбамызға құйылды.

Ардақты күз мың алғыс,

Алдық өнім, сыйыңды.

8.Көбейіп құт-береке,

Астық толы қамбамыз.

Құтты болсын мереке

Алтын күзді тойлаймыз.

9.Күзім-ау, күзім-ау,

Мінезің бұзық-ау.

Жаңбырың сіркіреп.

Келгенің қызық-ау.

10. Астық, жеміс жиналды,

Қамбаларға құйылды.

Ардақты күз, мың алғыс,

Алдым өнім-сыйымды.

Күз ханшайымы: Балалар, сендерге рахмет! Өздерің қандай әдемісіңдер, тақпақты жатқа айттыңдар. Балалар, менің сендерге бір жұмбақ жасырғым келеді.

Ортасында ұзын таяқ,

Төбенді торлайды.

Жазылса жаңбырдан,

Үйіндей қорғайды.

Балалар жұмбақтың жауабын айтады: Қолшатыр.

Жүргізуші: Аспанды бұлт торлайды,

Жаңбыр жаумай қоймайды.

Құйса жауын нөсерлеп,

Қолшатыр бәріңді жаңбырдан қорғайды.

Қолыңдағы қолшатырды жазып, балаларға көрсетіп: - Балалар, бәріміз білеміз, жаңбыр жауғанда қолшатыр болмаса, киіміміз су болады ғой. Қолшатыр бізді жаңбырдан қорғайды.

Күз ханшайымы: Дұрыс айтасыз, қане, балалар орнымыздан тұрайық, жарты шенбер құрайық, ойын ойнап алайық! Ойын: «Күн мен жаңбыр» Ойын шарты балаларға түсіндіріледі: Балалар жарты шеңберге тұрып «Екі бала» көңілді музыка әуенімен серуендеп жүреді, кенеттен жарқылдай соққан найзағаймен толассыз жауған жаңбырдың дауысын естіген сәтте тәрбиеші мен күз ханшайымы ұстап тұрған қолшатырдың астына барып тығылулары керек.