Аппликатурамен жұмыс жасау ашық сабағы, 1-сынып

Домбыра класының оқытушысы: Наурызбаева Қ.С.

МКҚК БҚО әкімдігі білім басқармасының Бөрлі ауданы білім беру бөлімінің«Балалар музыка мектебі»

БҚО. Ақсай қаласы

Ашық сабақ

Сабақтың тақырыбы: «Аппликатурамен жұмыс жасау»

Оқушы: Исламгалеева Бану 1 кл

Сабақтың мақсаты:

Домбыра аспабын ойнағанда аппликатураның маңыздылығын , ерекшелігін түсіну, меңгеру.

Көрнекілігі:

Аспап, нота, слайд.

Сабақтың барысы:

1.Ұйымдастыру бөлімі: Сәлемдесу.Оқушыны орындыққа ыңғайлы отырғызу. Аспаптың құлақ күйін келтіру.

2.Үй тапсырмасын тексеру: М.Әубәкіров.”Өрнек”. Күйді басынан соңына дейін жәй екпінде ойнап шығу.

Оқушы үй тапсырмасын ойнап көрсетеді.

3. Жаңа сабақ:Украин халық әні.”Ар жағында Дунайдың келеді казак”. шығармасындағы аппликатурамен жұмыс жасау.

Аппликатураға қысқаша тоқталып түсінік беру.

Аппликатура – кез келген аспапты ойнаған кезде перне басатын саусақтардың орналасу, алмасу тәртібі және олардың нотадағы белгісі. Орындаушылық шеберлік үшін дұрыс қойылған аппликатураның маңызы өте зор. Аппликатура барлық аспаптарда да ара сандармен белгіленеді. Шығарма үйренуде аппликатураны дұрыс пайдаланудың маңыздылығын еш уақытта естен шығармау керек. Оқушыға аппликатураны өзі қойып үйренуге жаттықтыру, оқытушының міндеті болып саналады. Қандай шығарма болмасын оқушының өзі ыңғайлы етіп тиісті аппликатураны қоя білуі, оның шығарманы дұрыс ойнауына, саусақтарын орынды пайдалана білуіне көп көмегін тигізеді. Алғашқы оқу баспалдағында оқушының аппликатураға ойлы, шынайы көзқарасын қалыптастыру қажет. Дұрыс қойылған аппликатура тез есте қалады. Аппликатура барлық аспаптарда да сандармен белгіленеді.Оқушы өзінің әрбір қолдарының, саусақтарының мүмкіндігін дұрыс пайдалануға үйренуі керек.

Орындау шеберлігі қалыптаспаған оқушы нота оқу кезінде дұрыс аппликатураны табуға қиналып, кез келген тәртіппен ойнай салады. Аппликатураға толық анализ жасау өте күрделі,сол себепті оқушыны үнемі бақылап отыру керек.

Домбыра аспабының аппликатурасы басқа аспаптарға қарағанда өзгешелеу болып келгенімен, негізгі принциптерді нысанаға аламыз. Сондықтан төменгі қағидалар домбырашылар үшін де маңызды

1.Қол қойылымын бастағаннан – ақ аспап мойнында саусақ қойылымы табиғи орналасуын қалыптастыру.

2.Әр саусақтың перне басуда тепе – тең күшін реттеу.

3.Саусақтардың жеке сезінуін қолға алу.

4.Алақан, білезік,білек,иық буындарының көмегін саралау.

5.Күймен шығарма орындаудағы аппликатуралық ерекшеліктерді ажырата білу.