Аққоян тақырыбындағы ашық сабақ, мектепке дейінгі топ

Тәрбиеші: Турганбаева Айгуль Бекжасаровна

Тобы: «Құлыншақ» орта тобы

Тақырыбы: «Аққоян»

Білім беру саласы: Шығармашылық

Бөлімі: Сурет

Мақсаты: Жабайы жануарлар туралы білімдерін жетілдіру. Әр түрлі пішіндерді пайдалана отырып, қоянның суретін салуды үйрету. Табиғатты сүйе білуге тәрбиелеу, ұсақ қол моторикасын дамыту. Ұқыпты сурет салуға үйрету.

Өтілу түрі: Дәстүрден тыс әдіспен

Технологиясы: «Тәй-тәй» технологиясы , ойын технологиясы.

Көрнекі құралдар: теледидар, слайд, тірі қоян, үстел үсті театрының атрибуттары, парақтар, бояу құйылған ыдыстар, поролон губкасы бар мөрлер, салфеткалар, қылқаламдар, тұғырлар. Дайын қоянның суреттері, желім, ақ салфеткалар, шырпы қораптарынан жасалған ойынға қажетті заттар.

Билингвалдық компонент:

Ақ-белый, қоян-заяц;

Барысы:

Ұйымдастыру кезеңі:

Қол ұстасып тұрайық

Үлкен шеңбер құрайық

Жаңа шыққан бұл күнге

Иіліп сәлем қылайық.

-Балалар, бір жылда неше жыл мезгілі бар?

-Қазір жылдың қай мезгілі?

-Күз мезгілінің ерекшелігі қандай?

-Күз мезгілінен кейін қандай жыл мезгілі келеді?

Балалар сұрақтарға жауап береді.

-Балалар сендер білесіңдер ме, күз мезгілінде ормандағы жануарлар қыс мезгіліне қандай дайындық жасайтынын? Олар қысқа қалай дайындалады екен?

(Презентация «Ормандағы жабайы жануарлардың қысқа дайындығы») «»

Ғажайып сәт: -Балалар, бізге ормандағы бір қонақ келіпті. Ол қандай жануар екенін білу үшін жұмбақ жасырайық.

Сылдырдан қорқады

Шошынып жортады (Қоян)

Тәрбиеші балаларға тірі қоянды көрсетеді. Қоянды балаларға бақылатып, сұрақтар қояды.

-Қоянның түсі қандай?

-Қоянның дене құрылысы қандай?

-Қоянның адамға пайдасы?

Қоян-шөл-шөлейтте, орманды далада мекендейді. Өсімдіктермен қоректенеді. Қоянның құлағы ұзын, құйрығы үлпілдеген қысқа. Артқы аяқтары алдыңғы аяқтарына қарағанда ұзын. Тісі өткір. Қояндар өзіне үйшік дайындамайды. Қысқа азық жинамайды. Бұта түбінде, орман жиегінде тіршілік етеді. Түнге қарай азық-іздеуге шығады. Көктем, жаз айларында жасыл шөп, өсімдік тамырларымен қоректенеді. Ал қыста қалың қар астына тығылады. Жаздағы сұр қоян күзде өз терісін ақ түске өзгертеді. Кейде ақ қоянды аңшылар қар арасынан байқамай қалады. Қоянның баласын көжек деп атаймыз.

-Ал, балалар білесіңдер ме, қоянның құлағы неге ұзын болатынын?

Осы жайлы мен сендерге ертегі айтып беремін.

(Үстел үсті театрын пайдалана отырып, тәрбиеші ертегі айтып береді)