Ақын рухына тағзым туралы қазақ әдебиеті мақаласы

Ақын рухына тағзым!

Бәрекелді!

«Ақ ұлпа жерді жапқанда, Ағаштар сырға таққанда,

Бозарып атқан ақ таңда, Бозарып тұрып ақпанда,

Есіңе мені алғайсың!»

М.Мақатаев.

Бүгін де жаһандану заманында көз ілеспес жылдамдықпен дамып келе жатқан еліміз әлемнің дамыған мемлекеттерінің қатарына қосылып, терезесі тең тұруды мақсат етті. Қазақ қашан да ақынын ардақтап, батырының орнын төр деп білген халық. Ендеше, тарих қойнауынан сыр шертер, лирикаға толы таңғажайып поэзиясымен 90 жыл уақыт өтсе де оқырман жүрегінен бір сәтте алыстамаған, ақиық ақын Мұқағали Мақатаевтың мерейтойы Рухани Жаңғыру аясында еліміздің түкпір-түкпірінде ерекше аталып өтті.

Мұқағали Мақатаев – қазіргі қазақ поэзиясында өзіндік із қалдырған шоқтығы биік ақын. Иә, асылында, Хантәңірдің Мұзбалағы атанған ақын, өлеңді өмір деп сүйіп, өнер деп түйіп, жауһар жырын асыл музасына балаған. Шалқыған шабытынан туған сезім толқындары оқырманның жан дүниесіне айрықша бір күй тудырып, әдемі әсерге бөлейді.

Ендеше ақынның туған күніне орай ұйымдастырылған айтулы шараға туған қаламыз да ерекше ілтипатпен қатысты. . Нақтырақ айтқанда, қала әкімдігінің ұйымдастыруымен «Есіңе мені алғайсың» атты Жетісулық таланттар арасында ақын өлеңін мәнерлеп оқудан онлайн челлендж өтті. Атаулы байқауға жүзден жүйрік, мыңнан тұлпарлар қатысып, өз өнерлерін инстаграм арқылы, әлеуметтік желіде өз парақшаларына әр үміткер жариялады. «Ат өнері білінбес, бәйгеге түсіп жарыспай, ер өнері білінбес, қоянқолтық алыспай» демекші аталған өнер сайысына мектебіміздің мақтанышы 9 «А» сынып оқушысы Смайл Азамат қатысып, бас жүлдені иеленіп, мерейімізді тасытты. «Бәрекелді!»- деп, бетін қақпай, белін будық. Қуанышымызды да жасырмадық! Сондай-ақ, орын алған барша жеңімпаздарды «Талдықорған қаласының мәдениет бөлімі» мемлекеттік мекемесінің бас маманы Әділ Исаханұлы өзі марапаттап, сыйлықтарды табыстап, жас таланттарға ақ жүректі тілегін арнап, қолдау көрсетті. «Өлсе өлер Мұқағали Мақатаев, Өлтіре алмас, алайда өлеңді ешкім!» деп ақынның өзі айтып кеткендей, өміршең өлеңдерін дәріптеу арқылы жас ұрпақ ақын рухына мәңгілік тағзым етеді.

«Абай атындағы №1 орта мектеп гимназиясы» КММ-нің қазақ тілі мен әдебиеті мұғалімі Талдыбаев Бектас Арғынғалиұлы.