Желтоқсанға тағзым тақырыбындағы эссе қазақ әдебиеті

Желтоқсанға тағызым

Жыл артынан жылдар жүйткіп, уақыт шіркін толассыз зымырап өтіп жатыр. Енді міне дауыл тербеген теңіздей буырқанып, жолындағысының бәрін ырғалта шайқалтып сол бір қастерлі де қасіретті күндерден бергі желтоқсан оқиғасының 30 жылы да тарих қойнауына тартып барады. Желтоқсан оқиғасы өзінің қайсарлығымен, алға қойған мақсат-мұратымен, тіпті жіберілген кемшіліктерімен де әрбір адамның есінде мәңгі сақталады.1986 жылғы желтоқсан оқиғасы қазақтың басын біріктіріп, бір жұдырыққа жұмылдырған бақытты да, қайғылы күн еді. Ал, бұл ұлы көтерілістің түп төркіні сонау әріде ата-баба тарихымыздың еншісінде жатыр. Яғни, қазақ жастарының желтоқсан көтерілісі – отаршылдыққа қарсы қазақ халқының әбден шегіне жеткен, ашу-ызасының бұрқ етіп жарылған сәті еді. Бұл оқиға дүниені дүр сілкіндірді. Көзден жас, көкіректен қан аққан сол күндер қалайша ұмыт қалсын: көмескі қалған көп іс бар, көкіректе қатқан беріш бар... Қас пен досты, жақ пен жатты, ақ пен қараны айна қатесіз анықтап берген сын сағат құрбандарына құдайы құлдық, қаһармандарына, аға-әпкелеріміздің рухына бас иіп, тізерлеп тұрып тағзым ету біздің парызымыз.

5 жыл өткенде 1991 жылдың желтоқсан айының 16-сы күні қазақ елі шынайы тәуелсіздікке қол жеткізді.

Желтоқсан көтерлісінде қыршын кеткен өрімдей аға-әпкелеріміздің Тәуелсіздік таңы атқанша бес жыл ішінде көрген қорлық, қиындықтарына қайғыра отырып, солардың қанымен келген тәуелсіздік мерекесін осы күні атап өтеміз. Міне, осы ұлы мерекеге 25 жыл толып отыр. Тәуелсіздік

бұл-басымызға қонған бақ, бақыт. Біз Мәңгілік елдің болашағымыз.Өз елің мен жеріңді көркейтіп, Қазақстанның намысын қорғайтын келешек ұрпақтың ақылшысы, тірегі болу басты борышымыз деп білемін. Тәуелсіздік туын биік ұстап, алға баса берейік демекпін! Ширек ғасыр арман болған тәуелсіздіктің қадірін түсіне білейікші!

Южный кенті Абай ауданы

«№9мектеп-балабақша» кешені»

9 «А»сынып оқушысы

Омарова Альфия