Баланың ерте жастағы тәрбиесі туралы баяндама

І. Кіріспе

Жас ұрпақты ерте жастан ақылды, білімді, еңбекқор, адамгершілік қасиетке ие азамат етіп тәрбиелеу - бәріміздің қасиетті борышымыз. Тәрбие бастауын отбасынан алатындықтан, ананың аялы алақаны, туған үйдің жылуы бала жүрегінде мәңгі сақталады.

Халқымыздың сан ғасырдан бергі даналығына құлақ ассақ, «Адамның бақыты - балада» деген екен. Кез келген адам өзі өмір бойы қуып жете алмайтын бақыт деген құдіретті сөздің өлшемі өмірінің жалғасы ұрпағымен келетініне мән бермеуі де мүмкін. Біреу бақытын байлықтан тапқысы келсе, екінші біреуі даңқ пен атақтан, мансап пен қызметтен іздестіреді. Мұның бәрі түсінген адамға қолдың кірі сияқты нәрсе. Адамға нағыз бақытты – тәрбиелі ұрпағы ғана сыйлай алады. «Адам ұрпағымен мың жасайды» деген сөз тегін айтылмаса керек. Олай болса адам өмірінің мәні – өз ұрпағы.

«Бала - басты байлығымыз, ал ең асылымыз – оның тәрбиесі» дегендей,

бала айналасындағы құбылыстардан жақсы мен жаманды ажырата алмаса да, көргенін тез қабылдап, есте жақсы сақтайды. Отбасынан кейінгі тәрбие ортасы болып саналатын балабақшада танып, қабылдаған нәрселерін күнделікті өмірде қолданады. Сондықтан да балаға тек үлгі болатын, жақсы мінез-құлыққа үндейтін мәліметті таңдап беруіміз қажет.

Бала тәрбиесi – игiлiктi iс. Берерi де, сұрауы да, жемiсi де мол тәрбие саласының ең өзектiсi. Халықта «Ағаш түзу өсу үшін оған көшет кезінде көмектесуге болады, ал үлкен ағаш болғанда оны түзете алмайсың» деп бекер айтылмаған. Сондықтан баланың бойына жастайынан ізгілік, мейірімділік, яғни адамгершілік құнды мінез-құлықты сіңіріп, өз-өзіне сенімділікке тәрбиелеуде отбасы мен педагогтар шешуші роль атқаратыны белгілі.

ІІ. Негізгі бөлім.

Бала тәрбиелеу – зор, елеулі, қуанышты, сонымен бірге қиын да іс. Бала белгілі бір биологиялық заңдылықтар бойынша дамиды. Баланың дені сау болып өсуіне ешқандай нұқсан келтірмеу үшін, бұл заңдылықтарды білу, ескеру және тиімді пайдалану қажет. Баланың адамшылығын қалыптастыру, оның ақылын молайту, көркемдік талғампаздыққа және талапқа баулу – бұдан да қиынырақ іс. Оған ата-аналар да, қоғамның әрбір мүшесі де бірігіп атсалысуы қажет. Ынтымақ бар жерде тәрбие де бар. Ынтымақ бар жерде береке, бірлік те бар.

Балабақша – отбасы – қоғам арасындағы ынтымақтастықты нығайту, серіктестікті қалыптастыру бірлескен іс-әрекет негізінде жүзеге асады.

Әке – білек, саусағы – балалары,

Қан тамырмен жалғасқан аралары.

Ана – тамыр бойымен бәріне де,

Тіршіліктің жылуы таралады, - демекші ел тірегі болашақ ұрпақтың бойына адамгершілік, рухани жылулық дарытар түрлі тәрбиелік іс-шаралар ата-аналармен бірлесе атқарылды.

Ата-ана балаға тәрбие беруде ата-бабамыздың салт-санасы, әдет-ғұрпында жүргiзiлген үлгi-өнегесiнiң мәнi зор. Сөз қадiрiн бiлетiн заманда бiр ауыз сөздiң iшкi мағынасын жете түсiнiп, содан өзiне тәлiм алған бабаларымыздың қасиетiне не жетсiн?!