Бастауыш сынып оқушыларына арналған бата жинағы

Бастауыш сынып оқушыларына арналған баталар

жинағы

Қуаныштың тұрағы бол, Ұлан істің бұлағы бол, Мерекенің құрағы бол, Мейірімнің шырағы бол, Сабырлының сыңары бол, Пәк үлгінің шынары бол, Туралықтың тұмары бол, Тұлғалы ұлттың құмары бол.

Әуелі құдай есен ет, Жиреншедей шешен ет, Атымтайдай көсем ет, Лұқпандай береген ет. Ибраһимнің басын берсін, Сүлейменнің тақытын берсін. Қыдыр құсы қонсын басыңа. Жортқанда жолың болсын, Жолдасың қыдыр болсын. Жоғары болсын жұлдызың, Бақытты болсын ұл-қызың. Ас иесі байысын, Бар ойлаған арманың, Жақсылыққа сайысын. Әумин

Дастарханың бай болсын. Қазан-ошағың май болсын. Төрт түлігің сай болсын. Көңілің толып жай болсын. Ұлың қонып қияға, Қызың қонып қияға, Келінің бибі атанып,

Ұлың болсын би аға. Бергеннен Алла танбасын, Көбейе берсін мал басың, Өсе берсін жан басың, Арманың көкке самғасын. Досыңнан көңілің қалмасын, Жағаңнан дұшпан алмасын, Жолың болып жортқанда, Жолыңды Қызыр жалғасын. Әумин

Әуелі құдай оңдасын, Аруақтарың қолдасын. Бақыт пен дәулет, бас пен мал, Басыңа мәңгі орнасын. Төрт құбылаң сай болсын, Саған қастық ойлаған Ғұмырында оңбасын. Ақылды бол, арлы бол, Бақытты бол, малды бол, Қатарыңның алды бол! Әумин

Аумин десең маған, Құдай берсін саған. Алтыннан – жағаң, Күмістен – тағаң. Оң жағыңнан кетпесін Күрпілдек қара сабаң. Жортсаң жолың болсын, Жолдасың қыдыр болсын. Тілеуің қабыл, Мұратың асыл болсын. Ішкенің қымыз, Жегенің сырбаз, Кигенің түлкі болсын, Жүрген жерің ойын-күлкі болсын!