Білімнің адам өміріндегі құндылығы туралы мақала

Білім керек бәріне

Бір күні әңгімелескім келіп, әжемнің жанына бардым. Әжемнің ыстық құшағында жатып, сырласқанды ерекше ұнатушы едім. Әңгіме барысында «білім» туралы сөз қозғалды. Сол сәтте әжем айтқан құнды сөздер әлі күнге дейін жадымда:

– Құлыным, білім ал, оқы. Әлемді таны, адамдармен аралас, білмегеніңді біл. Қазір сендер үшін мүмкіндік көп. Сол мүмкіндіктерді жіберіп алмау үшін әр адамға білім қажет, – деді.

Расында да, білімсіз адам қараңғы түнекте жол таппағанмен бірдей емес пе?

«Ілім – бұлақ, білім – шырақ» демекші, білімсіз өткен әр күн — босқа кеткен уақыт. Білімнің адам өміріндегі маңызы зор. Олсыз адам не бұл дүниеде, не ақыретте өз орнын таба алмайды. Бірақ, мұны түсінетіндер де, түсінбейтіндер де бар. Кейбіреулер оқымысты, ақылды адамдарға қарап:

– Олар тумысынан білімге жақын, оларға оқу оңай, – деп ойлайды. Алайда, шын мәнінде, білім ешқашан оңай жолмен келмейді. Білім алу үшін де ізденіс, шыдамдылық пен еңбек қажет. Кез келген адам бірден зерделі бола салмайды. Тек талабы зор, төзімді жандар ғана биік шыңға жете алады.

Қуантарлық жайт — қазіргі жастардың білімге құштарлығының артуы. Бұған еліміздегі оқыту орталықтары мен тіл үйрететін мекемелердің көбеюі дәлел. Мен өзім де ағылшын тілі курсында оқимын. Сол жақтағы балалар санын көрсеңіздер ғой — өте көп. Арасында жасы үлкені де, кішісі де бар. Тіпті, менен кіші балалардың ағылшын тілінде еркін сөйлейтінін көріп, олардың ынтасына тәнті болдым.

Дегенмен, қоғамның екінші бір тұсы да бар. Он саусақ бірдей емес, білімге немқұрайлы қарайтындар да кездеседі. Білімге селқос қарайтын балалар ғана емес, ата-аналар да бар. Спортпен айналысатын баланың өзі де өз саласында білімді, сауатты болуы қажет.

Қазақтың көрнекті ақыны Мағжан Жұмабаев: «Мен жастарға сенемін!» — деп бекер айтпаған. Бұл сөз — елдің ертеңі бізге аманат дегенді білдіреді. Сондықтан оны түсініп, өзіміз үшін де, еліміз үшін де білімге ынта қоюымыз керек.