Болашақтың басты бағдары білімде саяси сабақ

БОЛАШАҚТЫҢ БАСТЫ БАҒДАРЫ-БІЛІМДЕ

АЛТАЕВА ФАТИМА ЖАЛАЛАДИНОВНА

М.Мәметова атындағы Қызылорда гуманитарлық колледжі

Тарих пәнінің оқытушысы

Қазақстан Республикасы Президентінің «Төртінші өнеркәсіптік революция жағдайындағы дамудың жаңа мүмкіндіктері» атты Жолдауын насихаттау мақсатында «М.Мәметова атындағы Қызылорда гуманитарлық колледжі» коммуналдық мемлекеттік қазыналық кәсіпорнының студенттеріне ақпараттық-танымдық сабақтар өткізілді. Колледж студенттері оқытушылармен бірге Жолдауды талқылап, Мемлекет басшысы белгілеген негізгі басымдықтарды назарға ала отырып, цифрлы экономика жағдайындағы адами капиталдың қалыптасуына бағытталған шешуші қадамдарды бағдарлады.

Бұл маңызды құжатта айқындалған 10 бағыт Қазақстанның стратегиялық дамуына жол ашатын бірден-бір мүмкіндік.

Мемлекет басшысы Жолдауларының бәрінде дерлік білім-ғылым жүйесі әрдайым ескеріледі. Бүгінде ғылым мен білім-дамудың алғышарты ғана емес, қозғаушы күші де. Жолдаудың жетінші бағыты маңызды саналады. Әсіресе «Адами капитал-жаңғыру негізі» ерекше назарда, бұл жерде мәдениетімізді одан әрі дамыту үшін ұлттың әлеуетін арттыру туралы терең ой қозғалған. Адами капиталды, сол арқылы ұжымдық рухты дамыту ұлт және ұлы мемлекет ретінде дамудың алғышарты болса керек-ті.

Ұстаздар қауымын нақты қолдау бұл еліміздің алдағы ондаған жылдардағы саналы және білімді ұрпағына деген қамқорлықтың көрсеткіші болып отыр. Ұстаздар беделін көтеру және оларды материалдық тұрғыда қолдау-олардың лауазымдық еңбекақысын ұлғайту ғана емес, мұғалім мамандығының абыройын көтеруге, ең алдымен мұғалім біліктілігін жетілдіруге ынталандыруға, өзін-өзі жетілдіруге және оқытудың үздік әдістерін меңгеруге ықпал етеді.

Жолдауда Елбасы жұртымызды жаһандық үдерістерге бейімдеудің бағыт-бағдарын үнемі жетілдіріп отыруды тапсырады. «Барлық жастағы азаматтарды қамтитын білім беру ісінде өзіміздің озық жүйемізді құруды жеделдету қажет. Білім беру бағдарламаларының негізгі басымдығы өзгерістерге үнемі бейім болу және жаңа білімді меңгеру қабілетін дамыту болуға тиіс», деп атап өтті Н.Назарбаев. Адамның үнемі жетіліп, білімдері мен дағдыларын жаңарту қабілеттері өмірде жеке табысқа жетуіне және еліміздің гүлденуіне жол ашары сөзсіз. Қазіргі студент жастардың цифрлы дәуір жағдайында кәсіби ұмтылыстарын жүзеге асыру үшін зор әлеуеті бар және олардың инновацияларды қабылдауға дайын екендігін сеніммен айта аламын.

Білім мен рухани жаңғыруға байланысты осыған дейінгі жұмыстарымызды Елбасы көрсеткен дамудың жаңа мүмкіндіктері сапаландыра түседі деп ойлаймын.