Бүгінгі мектеп түлегі тренингі 11-сыныпқа арналған

«Бүгінгі мектеп түлегі-ертеңгі елдің тірегі»

Мақсаты: мемлекеттік емтиханға оқушыларды психологиялық қолдау, оқушы, мұғалім арасындағы қарым-қатынасты нығайту, оқушылардың өзіне деген сенімділігін арттыру,таңдау пәні дұрыс таңдауға бағыт-бағдар беру.

Қатысушылар: 11 сынып оқушылары, мұғалімдер

Көрнекілігі:

«Адам баласының құндылығы – оның білімінде һәм ойлана білуінде» (Жүсіп Баласағұни)

«Ерік- жігері күшті адам- нағыз мықты адам».

«Армансыз адам қанатсыз құспен тең».

Оқушылар «Атомдар және молекулалар» жаттығуы бойынша 3 топқа бөлінеді.(Талапкер, Үміткер, Болашақ)

Психологиялық сабақ 4 кезеңнен тұрады:

1. «Мен» жаттығуы 10 минут

2. Жағдаят шешу 15 минут

3. «Биіктік» жаттығуы 10 минут

4. «Екі бақа аңызы» 10 минут

Ұйымдастыру кезеңі: Сынып оқушылары түстер бойынша 3 топқа бөлінеді.

1. Психолог: Құрметті мектеп түлектері, сіздер Қазақстанның болашағысыздар, болашақ бүгіннен басталады! Сіздер кеше ғана бүлдірішін бала, қызыл шақа балапан болсаңдар, міне бүгін дүбірлі додаға қатысуға дайын, жарауы жеткен сайгүліктей ауыздықпен алысып тұрсыңдар. Алдарыңда үлкен болашақ, ұлы мақсат, міндет күтіп тұр. Асар белестерің, шығар биіктерің көп болсын. Іштеріңде көптген оқушылар болашақта кім, қандай маман иесі болатынын біледі. Біз, әрине барлығыңның армандарыңның орындалғанын қалаймыз. Данышпан философ Фалес айтқандай:

Дүниедегі ең үлкен нәрсе – Кеңістік

Бәрінен жүйрік - Ой

Бәрінен дана – Уақыт

Бәрінен қиыны - Өзіңді-өзің тану.

Адамның өзін-өзі тәрбиелеуде асқан шыдамдылық, қиыншылықтарға төзімділік, ерекше ұстамдылыққа машықтануы керек. Ата-ананың тілегі-баласының жақсы адам болуы, еңбексүйгіштігі, оқу мен еңбектегі табыстары. Өмір дегеніміз - арнасы кең өзен. Сол өзеннен өз арнаңды тауып ағу- басты мақсат. Қазір сендерге мынандай тапсырма: Алдарыңдағы А4 парағында көрсетілген «Мен» сөзіне бойларыңдағы қасиеттеріңді жазып көрсетіңдер.

Әр топқа сауалдар беріледі, ортақ пікірге келіп, топтастыру арқылы жауап беру.1-топ: Мемлекеттік емтихан және ҰБТ жайлы не білесің?2-топ: ҰБТ тапсыратын оқушының міндеттері қандай?3-топ: Таңдау пәнін дұрыс таңдай алдыңдарма?

2. Топтарға берілген жеке жағдаяттарды шешу. (15 минут)

ҰБТ дайындық барысында көптеген қиындық туындауы мүмкін, сондай жағдайларға дайын болуы үшін қазір сіздерге жағдаяттар беріледі. Соны шешулеріңіз керек. Әр топқа жеке жағдаяттар беріледі. Жағдаяттың шешімін жеке бөліседі, ал басқа топтар өз ойларын қосуға болады.

Жағдаят

1-топ Сіз сертификат алдыңыз. Бірақ құжат тапсырар кезде сізге таңдаған мамандығыңыз бойынша толық ақпарат алған кезде көңіліңізден шықпады, (оқитын ғимараты ұнамауы мүмкін, оқитын пәндеріңіз қызықтырмауы мүмкін) Сіз не істейсіз, сол мамандыққа тапсыра бересіз бе, әлде басқа мамандықты таңдар ма едіңіз?