Даусың өшпесін, қыз бала тақырыбындағы мақала 11 сынып

Дауысың өшпесін, қыз бала!

Автор: [Муталхан Әлия], 11 “в” сынып оқушысы, №209 мектеп-гимназиясы, Алматы қаласы

Қоғам тынысы – үнсіздік емес, шындықты айту. Ал сол шындықтың тасасында қалып келе жатқан – әйелдің дауысы. Біз оны естиміз бе? Біз оны естігіміз келе ме?..

Қыз бала дүниеге келгенде, кей қоғамдарда оны “әлсіз” деп қабылдайды. Қызы бар үй “жұмсақ” саналады. Бірақ менің жүрегім онымен келіспейді. Себебі қыз – нәзік гүл емес, ол – шын мәнінде найзағай. Ол – өмірге жарық әкелетін шырақ, қиындықта қайсарлық танытатын жүрек иесі.

Мен бұл мақаламды – жүрегі ояу, арманға асық, дауысы шықпай жүрген мыңдаған қыздарға арнаймын. Сенің дауысың маңызды. Сенің тарихың құнды. Сенің сөзің – болашаққа жол көрсететін жарық. Бірақ сен үнсіз қалсаң, ол жарық сөнеді.

Мен неге журналист болғым келеді?

Себебі мен шындықты айтқым келеді. Қоғамда қанша адам бар, сонша тағдыр, сонша шындық бар. Бірақ олардың барлығы көрініп, айтылып жатыр ма? Өкінішке орай, көбісі тасада қалып қойып жатыр. Солардың бірі – қарапайым қыздың арманы, ананың еңбегі, апаның үміті.

Мен сол үнсіз жүректердің сөзін естірткім келеді. Мен болашақта газет немесе теледидардан гөрі адамның жүрегіне жазғым келеді. Себебі журналистика – бұл жай ақпарат тарату емес, бұл – санаға сәуле түсіру, жүрекке ой салу.

Әйел – әлсіз емес, есті тұлға

Әйел туралы көп шаблон қалыптасқан. Ол тек үйде отыруы керек, ол тек қызмет көрсетуі керек деген таптаурындар бар. Бірақ қазіргі ғасырда бұл ескі түсініктер өзгеруі тиіс. Әйел – білімді болуы керек, пікірін ашық айтуы керек. Ол министр де бола алады, ғалым да, жазушы да.

Біз, жаңа буын, осы өзгерісті жасауымыз керек. Қыздарға “үнсіз қал” демей, “айт!” деуіміз керек. Қоғамға қыздардың жаңа бейнесі қажет — батыл, ақылды, сенімді.

Армандаудан қорықпа, қыз бала

Біз кейде: “Мұндай мамандыққа қыздар бармайды”, “Бұл ер адамдарға лайық” деген сөздерді естиміз. Ал неге бармасқа? Неге журналист болуға, режиссер болуға, саясаткер болуға қыздың хақысы жоқ деп ойлаймыз?