Денсаулық патшалығына саяхат, мектепке дейінгі материал

№19 ЖОББМ-нің жанындағы шағын орталығы.

Тәрбиеші: Габдуллиева Динара Мирамбековна.

Ұйымдастырылған ашық оқу қызметі

Тақырыбы: «Денсаулық патшалығына саяхат»

Білім беру саласы: Денсаулық, таным, шығармашылық, қатынас, әлеумет.

Бөлімдері:сөйлеуді дамыту, жапсыру, құрастыру, дене шынықтыру, қоршаған ортамен таныстыру.

Тақырыбы: «Денсаулық патшалығына саяхат»

Мақсаты:балалардың жеке бас тазалықтары туралы түсініктерін кеңейту.

Дәрумендердің адамденсаулығы үшін маңызы туралы түсіндіру. Есте сақтауын, ойлауын,тілін дамыту, шығармашылық қабілеттерін ашуға ықпал ету.

Алдын-ала жүргізілетін жұмыстар: Түрлі жаттығулар жасау, дәрумендер, тазалық, денсаулық туралы суреттер қарау, ата-аналарға тапсырмалар беру, тазалық туралы видеоролик қарау, мақал –мәтелдер жаттау, жұмбақтар шешу, ойындар ойнау.

Әдіс-тәсілдер: Көрсету, түсіндіру, ойын, әңгімелеу.

Көрнекі құралдар: спорт құралдары, тазалық құралдары, ойындар, теледидар, сызба жұмыстары.

Үш тілділік: денсаулық – здоровье – health.

Оқу қызметі кезеңдері

Себепті қызығушылығын ояту кезеңі

Шаттық шеңбері:

Бөбекжайға келгенде

Көп апайды көреміз

Бәріне де ізетпен

Біздер сәлем береміз

Сәлеметсіздерме,

Здравстуйте,

Гуд мониниг

Кел, балалар, келіңдер,Жақын келіп тұрайық.Шеңберді біз құрайық,Таңертең ерте тұрайық.Бетті, қолды жуайық.Тісімізді тазалап,Айнаға да қарайық.Шашымызды тарайық,

Жаттығу жасап шынығып Денсаулықты сақтайық.

Балалар шаттық шеңберін орындайды.

Балалар мен сендерге жұмбақ жасырайын. Сендер жауабын тауып көріңдер.

Жұмбақ шешу. Оны күткен адамдар, Ұзақ өмір сүреді. Қадірін білген жандар-Байлық – осы деседі. Шешуі не балалар?

Шешуі: Денсаулық

Дұрыс айтасыңдар. Балалар денсаулық дегенді қалай түсінесіңдер?

Таза болып жүру, дұрыс тамақтану, спортпен шұғылдану, жаттығу жасау, т.б

Енді денсалық деген сөзді үш тілде айтып көрейікші.

денсаулық – здоровье – health.

Онда, балалар, қазір ғажайып «Денсаулық патшалығына» саяхат жасайық.

Ғажайып сәт:

Күтпеген жерден Салақ пен Кірқожалақ пайда болады.

Ұйымдастырушылық ізденіс кезеңі

Тәрбиеші:

Бұл бала

Қай бала?

Бай-бай

Бет ауыз

Кір айғыз

Киімі кір сатпақ

Осы ғой

Нақ салақ!

-Сендер кімсіңдер?

Кірқожалақ: Мен осылай болып жүргенді ұнатамын.

Салақ: Біз тазалықпен дос емеспіз.

Тәрбиеші: -Сендер неге келдіңдер?

Кірқожалақ: Біз өзімізге дос іздеп келдік.

Салақ: Бізбен дос боласыңдарма.

Тәрбиеші: Онда сендердің жолдарың болмапты,

Арамызда ондай балалар жоқ.

Балалар: Біз тазалықты жақсы көрмейтіндермен дос болмаймыз!

Салақ пен Кірқожалақ: -Өтінеміз, бізді қумаңыздар.

Кірқожалақ: Біз сендермен дос болғымыз келеді.

Тәрбиеші: -Балалар, мүмкін оларды өзімізбен бірге «Денсаулық патшалығына» алып барармыз,оларды тазалыққа, әдептілікке үйретерміз.

Тәрбиеші: Салақ пен Кірқожалаққа қарап, -бізбен «Денсаулық патшалығына» барғыларың келе ме?

Кірқожалақ: -Ол қандай жер?

Салақ: -Ол жерде қорқынышты емес пе?

Тәрбиеші: Қорқатын еш нәрсе жоқ. Балалар сендерге көмектеседі.

Салақ пен Кірқожалақ: Онда келістік!

Тәрбиеші: Балалар екеуін өзімізбен бірге алып кетеміз бе?

Балалар: Иә, алып кетейік.

Тәрбиеші: Ендеше балалар оларды жуындырып, тазалап денсаулық еліне бірге алып барайық.Айкөркем мен Адият екеуің Кірқожалақ пен Салаққа біздің жуынатын тазалық бөлмемізді көрсетіп, жуынып келулеріне көмектесіңдер.

Тәрбиеші: Балалар денсаулық еліне немен барамыз.

Балалар: Денсаулық еліне жаяу барайық, жаяу жүрген денсаулыққа пайдалы.

Балалар «Денсаулық» еліне жаяу жүріп өлең айтып келеді.

Жалқаулықты тастаймыз,

Жаттығуды бастаймыз.

Қиынсынып қашпаймыз,

Шынығамыз жастай біз.

Иілеміз оңға бір,

Иілеміз солға бір.

Қимылдайды әр сәтте

Аяқта бір, қолда бір.

Денсаулық патшалығында оларды денсаулық елінің патшасы күтіп алады.

Патша: -Сәлеметсіңдер ме?! «Денсаулық патшалығында» сендерді көргеніме өте қуаныштымын.

Мен денсаулық елінің патшасымын. «Денсаулық патшалығына» қош келдіңіздер. -Сендер «Денсаулығы мықты» дегенді қалай түсінесіңдер?

Балалар: ол –ауырмай өсу,көңіл күйіміздің жақсы болуы, күш-қуатымыздың болуы.

-Дұрыс, Денсаулықтарың мықты болып, ауырмас үшін балабақшада не істейсіңдер?