Дұрыс әрекеттің өмірдегі орны туралы эссе, 11 сынып

Жалпыадамзаттық құндылықтың ішіндегі дұрыс әрекеттің менің өмірімдегі орны.

«Өрлеу» біліктілігін арттыру ұлттық орталығы» акционерлік қоғамының филиалы Оңтүстік Қазақстан облысы бойынша педагогикалық қызметкерлердің біліктілігін арттыру институтына «Сабақтағы жалпыадамзаттық құндылықтар» ұзақ мерзімді курсына өзін-өзі тану пәнінен оқуға келдім. Курс маған келген күннен бастап ұнады.Топтағы мұғалімдермен таныса отырып, тіл табысып кеттім. Осы курс барысында топқа бөлуде маған «Дұрыс әрекет» құндылығы түсті. Осы құндылық түскен күннен бастап мен ұзақ ойда болдым және кездейсоқ емес екенін түсініп, терең ойда болдым. Курс барысында тренер Аскарова Айжамал апай мәңгілік жалпыадамзаттық құндылықтарды, әлемдік кемеңгер, ойшылдардың, өмірбаяны, еліміздің сан ғасырлық өзіндік орны бар, халқымыздың даналығын білдіретін ірі тарихи, тұлғалардың рухани мұраларын жүрекке жеткізе айттып, қызықтыра отырып жеткізген кезде менде шабыт пайда бола бастады. Кемел өмір сүру ойдың, сөздің, істің бірлігінде екенін терең ұғына отырып, өзімде біршама өзгеріс болғанын байқадым. Өмірге деген көзқарасым мүлде басқаша болды.Қоршаған ортаның құндылығын сезіне отырып, дұрыс әрекет барысында ішкі тыныштығым орнады.

Отбасылық тәрбиеде ата-анам күнделікті өмірде кездесетін қарапайым адамгершілік қасиеттерді, қазақ салт-дәстүріндегі ұлттық тәрбиені бойымызға сіңіріп, өтірік айтпауға, біреуге қиянат жасамауға, әр қашан шыншылдыққа, әділдікке тәрбиеледі. Сондай тәрбие негізінде үлкен өмірге қанат қаққан кезде көкірегімде «Неге?» деген сұрақ жиі туындайтын.Осы курс барысында «Неге?» деген сұраққа жауап алдым. Яғни, қандай қиындық болса да, дұрыс әрекет жасау керектігін түсіндім.

Осы курс барысында өзіме құнды, пайдалы мағлұматтар алып, күнделікті өмірде іс жүзіне асырамын. Сонымен қоса практика кезінде өзімнің бойымнан көптеген өзгерістерді байқадым және дұрыс әрекет құндылығының мағынасын түсінгендей болдым. Мен осы мезгілде адамдарға, оқушыларға, туысқандарыма деген көзқарасымның және қарым-қатынасымның өзгергенін байқадым. Бұл мәңгілік жалпыадамзаттық құндылықтың ықпалы. Мысалы, мен күнделікті өмірде өзімді өзім тани келе, ізгілік педагогикасында еңбегі сіңген кемел адамдардың рухани мұрасы арқылы дамытып отырамын. Сосын күнделікті іс-әрекеттер мен үшін басқа қырыннан көріне бастады. Бұл менің жасап жатқан дұрыс іс-әрекетім деп ойлаймын. Әрине «Дұрыс әрекет» құндылығының түсуі кездейсоқтық емес.