Электронды дәуірдегі қағаз кітаптың болашағы 11-сыныпқа

Электронды ғасырда қағаз кітаптың ғұмыры қанша?

Кітап — білім мен руханияттың қайнар көзі. Адамзат тарихында кітап оқу – ой дамуының, дүниетаным қалыптасуының ең маңызды құралы саналды. Алайда ХХІ ғасырда, әсіресе соңғы онжылдықта, бұл мәдениет айтарлықтай өзгерістерге ұшырап отыр. Цифрлық технологияның дамуы мен интернет кеңістігінің кеңеюі дәстүрлі кітап оқуға үлкен әсер етті. Енді кітап парақтап оқу емес, экран қарап оқу — әдетке айналып барады. Бұл үрдіс — жаңа мүмкіндіктермен бірге жаңа мәселелерді де алға шығарды.

Бүгінде смартфон, планшет, электронды кітап оқитын құрылғылар көпшілік үшін ыңғайлы құралға айналды. Электронды кітаптар мен аудиокітаптар арқылы жастардың кітапқа деген қызығушылығы жаңаша түр алып келеді. Мәселен, оқушылар мен студенттер арасында «Google Books», «Litres», «kitap.kz», «Әдебиет порталы» сияқты платформалар танымал бола бастады. Бұл — уақыт талабына бейімделген игі қадам.

Дегенмен, цифрлық дәуірдің оң әсерімен қатар, оқу мәдениетінің әлсіреуіне де себеп болып отырған тұстары бар. Әлеуметтік желіде көп уақыт өткізу, қысқа әрі жеңіл контентке әуестік – терең мазмұнды кітаптарға деген ынтаны төмендетіп отыр. Жастар арасында тез ақпарат алуға үйренген сананың тұрақты мәтінмен жұмыс істеу қабілеті бәсеңдеуде. Бұл — тек оқылым дағдысына емес, ойлау тереңдігіне, сөйлеу мен жазу мәдениетіне де әсер етеді.

Кітап оқу тек білім жинау ғана емес, адамның ішкі мәдениетін, тіл байлығын, талғамын қалыптастырады. Кітап арқылы ұрпақ адамгершілік пен тарихты, әдебиет пен руханиятты бойына сіңіреді. Сондықтан цифрлық дәуірде кітап оқу мәдениетін жаңаша бағытта дамыту — маңызды міндет.

Қазіргі таңда елімізде «Оқитын ұлт», «Бір ел – бір кітап», «KitapTime», «Кітаппен бірге өсеміз» сынды жобалар жүзеге асуда. Кітапханалар заманауи форматқа көшіп, цифрлы жүйеге бейімделіп келеді. Жас оқырмандар арасында букчеллендждер, подкасттар, кітап блогтары көбейіп, әдебиетке деген жаңа серпін тудырып отыр. Бұл – үміт ұялататын үрдіс.Сонымен қатар, отбасы мен мектептің де рөлі ерекше. Бала жастан кітаппен дос болған ұрпақ – болашақта саналы, сұрыптай білетін, терең ойлы тұлғаға айналады. Ал кітапты сүйетін қоғам – мәдениеті биік, рухы асқақ қоғам.