Эмоциялар әлемі туралы психологиялық эссе

Эмоциялар әлемі

Бізді қоршаған әлем өзіндік заңдылықтары мен ережелері бар, ғажап құбылыстар мен оқиғалардан құралады. Қоршаған әлем түрлі түсті, кейде жылы, кейде суық, әсем көріністер мен бейнелерге толы. Алайда,бұл әлемнен бөлек, тағы да бір әлем бар. Оны бірден байқап, сезіну мүмкін емес болса да, ол әлем де бізді қоршаған орта секілді сан түрлі түстерге бай. Ол - әрбір адамның ішіндегі эмоциялық әлем.

Эмоциясыз өмірімізді елестету өте қиын. Эмоциялар күнделікті тұрмысымызды мәнді етіп, оған жан бітіреді. Эмоциялар әр түрлі жағдайларда, іс-әрекет үрдісінде нақты жетістіктерге бағалаушы қатынасты анықтайды. Өнер туындыларын қабылдауда, басқа адамдармен қарым-қатынаста пайда болатын ойлардың нәтижесінде адамның эмоционалды әлемі өзгеріп, құбылып отырады. Эмоциялар, бұған қоса адамдардың қарым-қатынастарын реттеуші рөлінде көрінгендіктен, психологияда эмоцияларға көп көңіл бөліп, кеңінен қарастырылады.

Эмоциялар өте құбылмалы. Мысалы, таңертең анашымның телефон арқылы : «Қызым, бүгінгі күнің сәтті өтсін!»-деген тілегі маған көтеріңкі көңіл күй сыйлап, мені ерекше жылы әсерге бөледі. Кейін аялдамада автобусқа үлгере алмаған кезімде менің бойымды бірден ашу мен ыза, өкініш пен күйініш биледі. Ал кешкі уақытта мұңды фильм көру барысында көңілім босап, еріксіз көзіме жас келді. Бұдан біз эмоциялардың әлемнің неткен тұрақсыз, бірқалыпты еместігін байқай аламыз.

Өзіңнің және өзгелердің эмоцияларын дұрыс түсіне алу, сезіне алу да бір тылсым өнер деп ойлаймын. Керек кезде эмоцияларға бой алдырмай, оларды басқара алу да көп адамның қолынан келе бермейді.

Дегенмен, «Таяқтың екі ұшы бар», сондықтан шамадан тыс эмоцияларды білдермей, іште сақтап қалу, дер кезінде білдірмей, жасырып қалу психосоматикалық аурулар секілді, өзге де жағымсыз салдарға алып келуі мүмкін. Сондықтан, ең абзалы – эмоциялар әлемімен тепе-теңдікте, гармонияда болу деген ойдамын.

Қорытындылай келе, эмоциялар барлық адамзат атаулыға тән болса да, әр адамның эмоциялық әлемі өзіндік ерекше қайталанбайтын, таңғажайып жаратылыс.

Психология мамандығының 4-курс студенті: Аскарова Ж. К.

Оқытушы: Болтаева А.М

Әл-Фараби ат. ҚазҰУ