Интеллектуалдық ойын 4 сыныпқа арналған сыныптан тыс жұмыс

Тапқыр достар

(интеллектуалдық сайыс)

Мақсаты: Оқушылардың білімге деген қызығушылықтарын арттыру. Әр түрлі тапсырмаларды орындау барысында логикалық ойлау қабілеттерін ұштау, зияткерлік қабілеттерін дамыту, дүниеге ғылыми көзқарастарын қалыптастыру, ғылыми білім жүйесін меңгерту.

Барысы:

1 Ұйымдастыру бөлімі:

«Тапқыр достар» атты зияткерлік сайысымызға қош келдіңіздер! Ойынымыздың алдында білім сайысының әділқазы мүшелерімен таныс болыңыздар.

Алдарыңызда өз білімімен, ақыл – ойымен, эрудициясымен ерекшеленген білімді оқушылар 2 топқа бөлініп сайысқа түскелі тұр:

1-топ «Жас қыран», 2-топ «Жас ұлан».

«Адам байлығының ішіндегі ең тамашасы - білім», - деген екен шығыс ғұламасы Әбу – р – Райхан әл Бируни. Ендеше білімімізді ортаға салайық.

Сайысымыздың шартымен таныс болыңыздар. Бүгінгі сайысымызда оқу пәндері, салт-дәстүрлеріміз жайлы сұрақтар мен тапсырмалар қойылады.

Сонымен, «Білім – біліктілікке жеткізер баспалдақ, ал біліктілік – сол білімді іске асыра білу дағдысы», -деген ұлы ұстаз Ахмет Байтұрсыновтың сөздеріне сүйене отырып І турды бастайық. І тур спринт сұрақтар. Әуелі ұяшық таңдаймыз. Ұяшықта таңдалған пән бойынша 10 сұраққа жауап беру керек.

1-ұяшық: «Математика». «Иә - жоқ» ойыны.

Үшбұрыш үш қабырғадан және үш төбеден тұрады.

Кесіндінің басы бар, аяғы жоқ.

1 метрде 110 сантиметр бар.

1 тәулікте 24 сағат бар.

Көбейткіштердің орнын ауыстырғаннан көбейтіндінің мәні өзгереді.

Ең кіші төрт таңбалы сан 9999.

6 мен 8 санының көбейтіндісі 48-ге тең.

1 тоннада 10 ц бар.

Ауданның ең үлкен өлшем бірлігі гектар.

Сауыншы 12 литр сүтті 4 бірдей ыдысқа құйды. Әр ыдысқа 4 литр сүт сыяды.

2-ұяшық: «Ана тілі»

Тұңғыш «Әліппе» оқулығын жазған Ахмет Байтұрсынов.

Абай Құнанбаев Батыс Қазақстан облысында дүниеге келген.

Қына басқа бітеді, білім тасқа бітеді.

Абылайдың шын есімі Әбілмансұр.

Түйенің пірі Ойсыл қара.

Отырарда туып, 150-ге тарта еңбек жазған Аристотель.

Ажалы улы жыланға айналып шағып өлтірілген Қорқыт.

Кей ертегілердің авторы болады, оны әдеби ертегі дейміз.

« Қуанғаным сонша, алдымда тұрған дөңгелек қара сақалды дембелше келген адамды сүйіп алуға әзір едім » деп жазыпты Ыбырай Алтынсарин.

Абайдың шын есімі Ибраһим.

3-ұяшық: «Қазақ тілі»

Жалпы есімдер бас әріппен жазылады.

Мәтіннің үш түрі болады.

Жұрнақ сөздің мағынасын өзгертеді.

Сөйлем мүшелері тұрлаулы, тұрлаусыз болып бөлінеді.

Қазақ тілінде 4 жалғаудың түрі бар.

Дауыссыз дыбыстар екіге бөлінеді.

Жауап алу мақсатымен айтылған сөйлемді сұраулы сөйлем дейміз.

Қоян сөзінде 4 дыбыс, 4 әріп бар.

Заттың атын білдіретін сөзді зат есім дейміз.

Қыстырма сөз сөйлем мүшесі болады.

4-ұяшық: «Дүниетану»

Су тасқыны қыста болмайды.

Ағаштардың жапырағы жазда түседі.

Дүние жүзінде 4 мұхит бар.

Қарағанды мен Екібастұзда мұнай өндіріледі.

Топырақтың түсі оның құнарлығы қарашірікке байланысты.

Қазақстан Еуразия материгінде орналасқан.

Өсімдіктер 7 үлкен топқа бөлінеді.

Қараша қыс мезгілінің айы.

Жүрек адамның сол жақ кеуде қуысында орналасқан.

Мыс пен мырыштың қосындысы жез болады.

ІІ тур. «Білгенге - маржан». «Тіл қаруы – сөз, сөз қаруы – ой, ақылды ой, алғыр сөз – адамның ең жоғарғы қасиеті» -деген Ғабиден Мұстафиннің сөзімен сайысты бастаймыз.