Кәсіби дамудағы басқару психологиясының маңызы

ФАРАБИ АТЫНДАҒЫ ҚАЗАҚ ҰЛТТЫҚ УНИВЕРСИТЕТІ – КӘСІБИ ДАМУДЫҢ КЕПІЛІ.

Әл-Фараби атындағы Қазақ ұлттық университеті – еліміздің жоғары білім беру жүйесіндегі жетекші оқу орындарының бірі. 1934 жылы құрылған бұл университет қазіргі таңда әлемдік деңгейде мойындалған, QS World University Rankings рейтингінде алғашқы 200 жоғары оқу орнының қатарынан орын алған беделді оқу ордасы болып табылады.

ҚазҰУ-да білім беру үдерісі тәжірибелі профессор-оқытушылар құрамымен, заманауи материалдық-техникалық базамен және инновациялық әдіснамамен қамтамасыз етіледі. Университет қабырғасында студенттер мен магистранттардың жан-жақты дамуына барынша қолайлы жағдай жасалған.

Осы университетте «Физика пәні мұғалімдерін даярлау» мамандығы бойынша магистратурада білім алып жатқан жас педагог үшін бұл кезең кәсіби және тұлғалық дамудың маңызды сатысы болды. Екінші семестрде оқытылатын Нуржамал Сейдалиевна жүргізетін «Басқару психологиясы» пәні ерекше әсер қалдырған курстардың бірі саналады.

Бұл пән алғаш сабақтан-ақ өз ерекшелігін танытты. Мұнда дәстүрлі дәрістер мен пассивті тыңдаудан гөрі, интерактивті форматтағы белсенді, мазмұнды сабақтар ұсынылады. Әрбір сабақ – бұл тренинг, топтық жұмыс немесе арт-терапия түрінде ұйымдастырылған тәжірибе алаңы. Осы арқылы магистранттар теориялық біліммен қатар, басқарудың психологиялық қырларын тәжірибе жүзінде игеру мүмкіндігіне ие болды.

Көшбасшылық қабілеттерді анықтауға арналған тренинг – ең әсерлі сабақтардың бірі ретінде аталды. Топтағы бір ғана студент көшбасшылық қасиетін айқын көрсете алғанымен, бұл үдеріс топ ішіндегі рөлдердің қалай қалыптасатынын, жеке ұстанымның маңызын және ұжымды қолдау жолдарын тереңірек түсінуге жол ашты. Бұл тәжірибе тұлғалық дамуға үлкен серпін берді.

Аталған пән тек педагогикалық мәселелермен шектелмейді. Ол ұжымдағы қарым-қатынасты тиімді орнату, қақтығыстарды шешу, ортақ шешім қабылдау механизмдері сияқты өмірлік маңызы бар дағдыларды да қамтиды. Бұл білім тек кәсіби салада ғана емес, күнделікті өмірде де жоғары бағаланады.

Курстың әсерлі өтуіне оқытушы Нуржамал Сейдалиеваның кәсіби шеберлігі мен ерекше әдістемелік тәсілдері тікелей ықпал етеді. Оның сабақтары ынталандырады, қызықтырады және дамуға мотивация береді. Бірлескен тапсырмалар топ ішіндегі ауызбіршілік пен өзара түсіністікті нығайтты – бүгінде бұл академиялық топ әлдеқайда ұйымшыл және тату ұжым ретінде қалыптасты.