Халық қаһармандары мен ел батырлары туралы шығарма

Халық қаһармандары – ел батырлары

Ел басына күн туған зұлмат заманда етігімен су кешкен ерлеріміз қаншама. Ел басына туған күн, ер басына туған күн емес пе? «Ер басына күн туса, етігімен су кешер. Ат басына күн туса, ауыздықпен су ішер» деген халқымның ұлағатты сөзі осының айғағы іспетті. «Отан үшін отқа түс күймейсің» деген сөзді қазіргі күні жиі естиміз. Осы сөздің парқына бара алмай жүруші едім, енді түсінген сияқтымын. Шіркін, бабаларым-ай, әрбір айтқан сөзінің астарында терең мағына, патриоттық тәрбие бар екен-ау! Міне, осы айтылған асыл сөз ойыма оралған сайын, сонау 1941-1945 жылдардағы Ұлы Отан соғысында ел үшін қолына қару алып, жалындаған оттың ішінде айдаһармен алысқан алып аталарымыз еске түседі. Осы батыр аталарымыздың айбынды ерлігінің арқасында бүгінгі күні еркін, бейбіт өмір сүрудеміз.

«Елім деп еңіреген ер болмаса, ерім деп еңірейтін ел қайда» демекші, бүгінгі таңда дархан даламызда батыр аға, аталарымыздың есімі есіп тұрғанда оларды еске алмау, бүгінгі ұрпақ бізге сын болмай ма. Менің аталарымнан қолына қару алып, қан майданға аттанғаны болмасада, сол кездегі қару ұстаған қаһармандардың барлығы менің атам десем артық айтқаным болмас. Міне, осы адамдардың әр қайсысын Халық қаһармандары – ел батырлары десек жарасады. Ендеше осы қаһарман аталарымыздың бірі емес, бірегейі халық қаһарманы, Совет одағына «Васья» деген атпен танымал болған партизан Қасым Қайсенов атамыз жайында қысқаша тоқталайын.

Қасым Қайсенов атамыз 1941 жылы қарашада Оңтүстік-Батыс майданның штабында, басқыншылардың қолында қалған Украина жерінде партизан отрядын құру бойынша арнайы тапсырмамен жау тылына түсіріледі. Ол жерде Қайсенов Чапаев атындағы партизан құрамасының үшінші отрядын басқарды. Осы партизандық тапсырманы орындау кезінде көптеген көзсіз ерлікке барғаны алтын әріппен тарихта жазылып тұрғаны белгілі. Мұны өз Отанымызда түсірілген, 4 бөлімнен тұратын «Қасым ҚАЙСЕНОВ» фильмі айғақтай түседі. Ұлы Отан соғысының ержүрек батыры, аты аңызға айналған әйгілі партизан атамыздың өшпес ерлігі бүгінгі ұрпақтың кеудесінде мәңгі сақталатынына сенемін.