Халықтың амандығы мен әл-ауқаты туралы мақала

ЕҢ БАСТЫ МАҚСАТ – ХАЛҚЫМЫЗДЫҢ АМАНДЫҒЫ МЕН ӘЛ-АУҚАТЫН АРТТЫРУ

Қазақстан Республикасының Президенті Қасым-Жомарт Тоқаев Парламент палаталарының бірлескен отырысында Қазақстан халқына «Халық бірлігі және жүйелі реформалар - ел өркендеуінің берік негізі» атты Жолдауын жариялап, Қазақстанның алдағы даму стратегиясын айқындап берді.

Мемлекет басшысы пандемиядан кейінгі кезеңде елді одан әрі дамытуға, денсаулық сақтау жүйесінің тиімділігін арттыруға, сапалы білім беруге, өңірлік саясатты жетілдіруге, еңбек нарығында тиімді экожүйені құруға, саяси жаңғыртуға, адам құқықтарын қорғау және қоғамды нығайтуға бағытталған бірқатар бастамалар ұсынды.

Жолдаудың негізгі басымдықтарын белгілей отырып, Қасым-Жомарт Тоқаев барша қазақстандықтардың амандығы мен әл-ауқатын арттыру оның Қазақстан Президенті ретіндегі басты мақсаты екенін баса айтты.

Бұл мақсатқа жету үшін Мемлекет басшысы бес негізгі бастаманы алға тартты. Бұл бастамалар, ең алдымен, халқымыздың әл-ауқатын арттыруға арналған.

Біріншіден, Қасым-Жомарт Тоқаев ең төменгі жалақыны 2022 жылдың 1 қаңтарынан бастап қазіргі 42,5 мыңнан 60 мың теңгеге дейін көтеру туралы шешімін жариялады. Бұл шара миллионнан астам адамға тікелей, ал жанама түрде – барлық еңбеккерлерге әсер етеді.

Екіншіден, Президент еңбекақы төлеу қорының өсімі соңғы 10 жылда кәсіпорын иелері табысының өсімінен 60 пайызға жуық қалып қойғанын ескертіп, осыған байланысты Үкіметке бизнесті өз жұмысшыларының жалақысын көбейтуге ынталандыратын «ұтымды» шаралар әзірлеу тапсырды. Қызметкерлердің еңбекақысын көбейткен жұмыс берушілерге реттелмелі сатып алу жүйесі аясында жеңілдіктер беріледі. Сондай-ақ, оларға мемлекет тарапынан белсенді қолдау көрсетілетін болады.

Үшінші бастама еңбекақы төлеу қорына түсетін жүктемені азайтуға бағытталған. Мемлекет басшысы жалпы жүктеменің 34%-дан 25%-ға дейін төмендеуімен микро және шағын бизнеске жалақы қорынан бірыңғай төлем енгізуді ұсынды. Бұл шара бизнесті мыңдаған қызметкерін «көлеңкеден шығаруға» ынталандырады. Сонда олар зейнетақы жүйесінің, әлеуметтік және медициналық сақтандыру жүйесінің толық қатысушысына айналады.

Төртіншіден, Қасым-Жомарт Тоқаев 2022 жылдан 2025 жылға дейін бюджеттік сала қызметкерлері санаттарының (мәдениет мекемелерінің, мұрағаттардың, кітапханалардың және т.б. қызметкерлерінің) жалақысын жыл сайын 20% -ға арттыруды тапсырды. Бұл бастаманы жүзеге асырудың нәтижесін 600 мыңға жуық отандасымыз сезінетін болады.