Химия негіздері бойынша қолданбалы курс, 10-сынып

Жалпы химия негіздері

Түсінік хат

Қазіргі кезде білім беру жүйесінде әлемдік білім беру кеңістігіне енуге бағытталып қалыптасу процесі жүріп жатыр. Білім беруді дамыту оқушылардың білімі мен біліктерін елеулі түрде көтерумен шектелмейді, сонымен қатар олардың мәдениетін, қабілетін, шығармашылық мүмкіндігі мен өзіндік қасиетін максимальды дамытуды, бала денсаулығын сақтап, нығайтуды, адамгершілік құндылықтар жүйесін қалыптастыруды көздейді. Педагогикалық процестің маңызды құрам бөлігі – мұғалім мен оқушы арасындағы жеке адамға бағытталған өзара қарым-қатынас. Бұл ретте оқушылардың шығармашылық мүмкіндіктері мен танымдық белсенділіктерін және практикалық қабілеттерін арттыру, саралап оқыту, бейіндік оқытуды жалғастыру шаралары жүзеге асырылуы тиіс.Әрбір оқушының қызығушылығы мен қабілетін ескеру, оқытудың іс-әрекеттік мәнділігін арттыру, білімнің практикалық бағытталуын күшейту, оқу материалдарының мазмұнын оқушының өмір тәжірибесіне жақындату, оның өз бетінше оқу және ізденушілік қызметін кеңейтетін жағдайлар туғызу білім сапасын арттырудың пәрменді тәсілдері болып саналады.

«Жалпы химия негіздері» курсы бейорганикалық және органикалық химия курстарында алған химия ғылымының заңдары мен теорияларына , химиялық процестер мен өндірістерге жүйеленген, қорытындыланған және тереңдетілген түрде жалпы шолу береді.Бүкіл материалды жоғары деңгейде қарастырып, жүйеге келтірілген көрнекі сызбанұсқалар мен кестелер құрастырылады және пайдалануға беріледі.Бұрын оқылған материалдарға салыстырмалы талдау жүргізу және олар жайындағы қорытынды мағлұматтар алуда көмек береді.

Курстың мақсаты мен міндеттері

Қолданбалы курстың мақсаты – жоғары сынып оқушыларының химиядан алған білімдерін кеңейту және тереңдету, оқу материалын жоғары деңгейде қарастырып, жүйеге келтіру.

оқушының ғылыми дүниетанымын қалыптастыру;

білім жүйесін шығармашылықпен қабылдау тәсілдерін үйрету, химиялық ұғымдарды заңдылықтарды пайдалана білу;

оқушылардың үздіксіз білім алуға үйрету;

өздіктерімен қорытындылап, жүйеге келтіре білуге көмек беру;

алған білімді өздігінен талдап , баға бере білуге тәрбиелеу

оқушылардың мамандық таңдауына ықпал ету.

Курсты өткізу әдістемесі

Курсты оқыту формасы дәріс-семинар жүйесі түрінде жүргізіледі. Оқыудың дәріс – семинар жүйесі оқу процесінде дәстүрлі емес оқыту формаларын кеңірек қолдану арқылы жоғары сынып оқушыларының оқу процесіне саналы түрде белсенділікпен қатысуына, олардың өз іс-әрекеттерін өздері жоспарлауына мүмкіндік туғызады. Нәтижесінде жоғары сынып оқушыларының өзіне қажетті мәліметтерді іздестіру және жинастыру, қажеттісін алып өңдеу, оны пайдалану (ақпараттық) , жазбаша қарым-қатынас , елдің алдында сөйлей алу, топпен жұмыс жасау , т,б, іс-әрекеттерді (коммуникативтік) , іс-әрекетті жоспарлау, талдау жасау, бағалау (шешім қабылдай алу), түзету, оқу мақсаттарын айқындау, оқу тапсырмаларын қоя білу, зерттеу жүргізе алу біліктіліктері қалыптасады.

Әдістеме жаңа білім технологияларын кеңінен қолдануды қарастырады (проблемалық оқыту,дамыта оқыту,интерактвті әдіс,жобалау,сын тұрғысынан ойлау,біліктілікті зерттеу т.с.с.)