Кимешек кигізу салтына арналған Наурыз сценарийі

Кимешек кигізу салты

Кемпірлер көшеге шығып, бір-бірімен қауқылдасып, өлең айтып келе жатады:

Боз беткейлі-ай ендеше, боз беткейлі а-ахау, Бозбеткейден-ай, ендеше, мал кетпейді-ай, қоғалай қоңыр салқын-ай малға жай! Қоғалай, қоңыр салқын-ай, малға жай!

1-кемпір: -Е-е-е, шіркііін десеңші! Наурыз күні Жаратқанның күні де жарқырап тұрғанын қарашы! Әй, қыз-келіншектер, замандастар-ау, күншуақта әңгіме-дүкен құрып отырсақ қайтеді?! Ішімізде жүрген реніш болса, шығарып, көңіліміздің кірін кетіріп, бір тазарып алсақ деймін!

Кемпірлер, қыз-қырқындар шуласып: ия,ия, сөйтейік!-деп, көк майсаға жайғасып, ұршық иіріп, кесте тоқып, әңгімеге кірісіп, әндетіп отырады. Осы кезде әдемі әнді бөліп, бір кемпір:

2-кемпір: -Әй, анау Айкүміс замандастың үйіндегі былтыр түскен келін босаныпты дейді, шілдеханасын өткізіп қойған дей ме, естідіңдер ме?

Қалғандары шуласып: - Ааа, солай дей ме? Ұл ме екен, қыз ба екен? - деп жатқанда:

Шақырушы: -Уа, халайық, халайық! Мұнда назар салайық!

Ата жолын жалғамақ, ел дәстүрін қолдамақ.

Айкүміс әже үйінде Былтыр түскен келінге

Кигізбекші кимешек. Ұлды бопты келіншек!

Келсін! – деді,- тезірек! Кимешекті кигізбек!

Кемпірлер бірінен соң бірі: Е-е, шырағым құтты болсын!Дұрыс болған екен? Қой, енді не отырыс? Сонда барайық!

Жол-жөнекей сөйлесіп келе жатады, 3- кемп.: Туған соң адам боп, білімсізден жаман жоқ. Ел дәстүрін білмесең, жұрт айтады надан деп.

4-кемпір: Бауырласқан тәніміз, бұзылмаған антымыз! Кең даланың ежелгі қазақ дейтін халқымыз! Өзге ұлттай біздің де бар дәстүр мен салтымыз!- деп келе жатып, шақырған үйге де жетіп қалады.

Енесі (кимешек кигізу рәсімін жасаушы): -Жиналыппыз сәтті күні бәріміз де, Үлкен-кіші, жасымыз, кәріміз де! Төрлетіңдер, қадірменді қонақтарым. Гүл-гүл жайнап мына біздің төрімізге!

5-кемп.: (Дастарханға отырып жатып) Жаңарғаны сананың, Ұмытады мұны кім? Ата салты бабамның Кимешекті киетұғын сай жасына, Әрбір әйел басына!

(Келіндер қымыз сапырып, қонақтарына құйып бере бастайды. Қонақтар нан ауыз тиіп, қымыздан ұрттап отырады)

6-кемпір: Той деп бүгін көңіл шіркін тасиды, той деп бүгін халқым шашу шашады. Арамызда жасы үлкен, елге сыйлы, көп балалы әжеміз – Райхан ана кимешекті кигізсін!