Кореялық сұлулық стандарты және жасөспірім психологиясы

Айнадағы түр емес, жүйенің ізі: Кореялық сұлулық стандарты мен жастық психологияның құлдырауы

Бүгінде “сұлулық” – таңдау емес, міндет. Ал Корея бұл стандарттың майдан шебі. Кішкентай бет, үлкен көз, ақ тері, нөлдік май, түзу мұрын. Бұл – енді сұлулық емес, тірі қалудың шартына айналды. Корея жастары сол стандарт үшін өмір сүруді емес, өздерін өзгертіп өмір сүруге мәжбүр. Ал бұл көрінбейтін, бірақ өте қауіпті психологиялық соғыс.

Сұлулық стандарты: бостандық емес, басыбайлылық

Кореяда бет-әлпет – визитка ғана емес, адамның құны. Жұмысқа қабылдау, танысу, достық, тіпті күнделікті қарым-қатынас – барлығы сенің қаншалықты “стандартқа сай” екеніңе тәуелді. Мектеп бітірген соң, пластикалық операция – түлекке арналған сыйлық. Себебі егер бетің теледидардағы айдолдарға ұқсамаса – сені бұл қоғам қабылдамайды.

Артық салмақ – артық адам деген сөз

Артық салмақ – Кореяда науқас емес, айып. Толық адамға “сен өзіңді күтпегенің үшін кінәлісің” деген көзқарас қалыптасқан. Тіпті телешоуларда немесе сериалдарда толық кейіпкерлер жиі мазақ нысаны. Олармен күліп ойнайды, оларды “өзін сүймейтін”, “жалқау”, “нашар” ретінде көрсетеді.