Көрнекі жобасы және қазақ тілінің мәртебесі

«Көрнекі» жобасы

Тіл тағдыры ел тағдыры демекші, қазақ тілінің мәртебесін арттыруда жыл сайын көптеген жұмыстар атқарылып жатыр. Мемлекеттік тіліміз 30 жылдан астам уақытта жоғарғы дәрежеде дәріптеліп келсе де, бүгінде жасылынатын жұмыстар аз емес.

Халықаралық «Қазақ тілі» қоғамы еліміздегі мәселелерді шешу үшін арнайы жобалар әзірлеп, іске асыруда. Солардың бірі «Көрнекі» жобасы. Жобаның басты мақсаты: кәсіпкерлік нысандарға көрнекі ақпаратты Қазақстан Республикасының Тіл туралы заңының талаптарына сәйкестендіруге көмектесу.

«Көрнекі» жобасы сауда үйлеріндегі, мейрамханалардағы, дүкендердегі баннерлер, маңдайшалар, хабарландырулар, жарнама, баға көрсеткіштері секілді қоғамдық маңызы бар құралдардың қазақ тілінде болуын бақылайды. Қажет болған жағдайда, көрнекі ақпарат мәтіндерін орфография нормаларына сәйкес тең түпнұсқалы формада қазақ тіліне аудару үшін тегін көмек көрсетеді.

Қала тұрғындары да жобаға өзіндік үлесін қосу үшін мүмкіндіктер қарастырылған. Кәсіпкерлік нысандарда қазақ тілінің мәртебесіне қатысты заң бұзу фактілерін анықтаған жағдайда Google сауалнамасын толтырып немесе telegram бот арқылы хабарлай алады. Келіп түскен шағымдар бойынша арнайы тексерістер мен жұмыстар жасалынады.

Сонымен қатар, Халықаралық «Қазақ тілі» қоғамы еріктілерді «Көрнекі» жобасын іске асыруға шақырады. Еріктілер Қазақстан Республикасының Тіл турады заңнамасының талаптарына сәйкес келмейтін көрнекі ақпараттарды анықтау үшін Астана қаласының көшелерінде мониторинг жүргізеді. Google сауалнамасы немесе telegram бот арқылы келіп түскен кәсіпкерлік нысандарының иелеріне Тіл туралы заңды еш ұрыссыз, мәдениетті түрде түсіндіреді.

Қазіргі таңда, «Көрнекі» жобасы аясында 2000-нан астам нысандарға мониторинг жүргізіліп, консультациялық-әдістемелік көмек көрсетілді.