Көшбасшылар – елдің ертеңі туралы мақала

Көшбасшылар-елдің ертеңі

Адам баласына қанмен келетін туа біткен қасиеттердің бірі де бірегейі-көшбасшылық. Біздің заманауи тілмен айтар болсақ лидерлік қасиет. Ондай қасиет бойында бар адамдар кез-келген ортаға тез сіңіп, айналасындағы адамдарды өзіне бағындыра алады. Қазіргі заман талабына сай бәсекелестікке түсе білу үшін де болашақ жастарымыздың бойында мұндай қасиеттер табылғаны абзал.

Бүгінгі күні мектеп жасынан көшбасшылық қабілетті дамыту үшін өзін-өзі басқару ұйымдары жұмыс істейді. Бұл ұйым мектептің тәрбие бағытында жүзеге асырылады. Оқушылардың бойындағы таланттарын ашып, оларға қолдау көрсету бұл ұйымның басты міндеті. Республикалық деңгейде мұндай ұйымдар облыс, қала, аудан, ауыл мектептерінде жасақталған. Көшбасшылыққа қызығушылық танытқан оқушылардың басы біріккен ұйым сегіз фракциядан тұрады. Атап айтсақ: экология және еңбек, қамқорлық, құқық және тәртіп, бақыт, спорт және салауатты өмір салтын сақтау (СӨС), дебат қозғалысы, ақпарат, мәдениет және өнер. Аталмыш фракция мүшелері өз кезегінде түрлі шараларды ұйымдастырып, бос уақыттарын тиімді өткізеді және сайлау нәтижесі бойынша парламент президенті тағайындалады.

Көшбасшылардың қатарында болу бала күнгі армандарымның бірі болатын. Себебі бастауыш сынып оқып жүрген кезімнен ұйым мүшелерінің топтасып жасап жүретін жұмыстарына қызыға қарайтынмын. Уақыт өте келе жоғары сыныпқа өткенімде, өз бағдарламамды дайындап сайлауға үміткер болдым. Нәтижесінде 34% көрсеткішпен Хамидолла Нәубетов атындағы орта мектептің “Болашақ” мектеп парламентінің президенті атандым. Қазіргі таңда күні бүгінге дейін өз міндетімді мүлтіксіз атқарудамын.

Көшбасшылық жолымда қабілетімді шыңдау мақсатында 2022 жылы “Балдәурен” республикалық оқу сауықтыру орталығында өзім сияқты лидерлермен бірге тәжірибе алмастым. Сондай бас қосулардың бірі 2024 жылғы “Әрекет уақыты” республикалық балалар мен жасөспірімдер құрылтайын атап айтар едім. Республикалық құрылтайға қатысу үшір еліміздің түкпір-түкпірінен аудандық, облыстық кезеңдерден өткен дарынды әрі көшбасшы оқушылар жиналды. Жоғары деңгейде өткен құрылтайда РҚББОӘО басшысы Ш.Р.Петровнамен және ҚР Парламенті Мәжілісінің депутаты, Халықаралық істер, қорғаныс және қауіпсіздік комитетінің мүшесі К.Б.Бақбергенұлымен кездесіп, лудамания сынды өзекті мәселелер туралы пікір алмастық. Осындай жиындар оқушылардың көшбасшы болуға қызығушылығын арттырары анық.