Математикадағы интерактивті әдістердің тиімділігі, 10-сынып

Математика сабақтарында оқытудың интерактивті әдістерін пайдаланудың тиімділігі

Білім алушылардың белсенділігін арттыруға мүмкіндік беретін әдістемелік тәсілдер интерактивті деп аталады.

Өзара әрекеттестік әдетте белгілі бір мәселені шешу, ол шешімнің тиімділігін туралы әңгімелесу, талқылау түрінде өтеді.

Интерактивті оқыту технологиясы – бұл ұжымдық, өзін – өзі толықтыратын, барлық қатысушылардың өзара әрекетіне негізделген, оқу үрдісіне білім алушының қатыспай қалуына жол бермейтін оқыту үрдісін ұймыдастыру.

Бұл интерактивті әдістің мақсаты – тек ақпаратты беру ғана емес, білім алушыларға жауаптарды өз бетінше табу дағдысын меңгертумен байланысты.

Интерактивті оқыту моделін пайдалану өмірлік жағдайларға негізделген рөлдік ойындарды қолдануды, мәселені бірлесіп шешуді қарастырады. Бұл мәселеге адамгершілік пен демократиялық тұрғыдан қарауды үйретеді.

Интерактивті оқыту әдістері тұлғааралық қарым – қатынасқа негізделе отырып, жеке тұлғаны дамытуға бағытталған білім беруді қанағаттандырады. Сапалы білім алудың алғышарттары болып табылатын таным белсенділігі мен ізденіс дербестігін қалыптастырып қана қоймай, ары қарай дамытады.

Интерактивті оқыту әдістері дәстүрлі оқыту әдістерінен оқу үрдісінде білім алушылардың өзінің өмірлік тәжірибелерін пайдалану арқылы жеке және кәсіптік қабілеттерін аша алуына ықпал ететіндігімен ерекшеленеді.

Интерактивті оқытудың төрт негізгі тиімділігі бар:

Білім алушыға өздігінен ізденуге мүмкіндік береді.

Білім алушыларға топтасып оқып – үйренуге жағдай жасайды.

Білім алушыларды өздерін – өздеріне немесе өзара бағалатуға мүмкіндік береді.

Іс – әрекет барысында білім игеруге жол ашады.

Интерактивті әдісті пайдаланудың тиімділігі сол – білім алушылардың өз ойын еркін, жүйелі айтуына, ұйымшылдыққа тәрбиелейді. Табиғатынан тұйық, өз ойын жеткізе алмайтын, өздеріне сенімсіздеу білім алушылар үшін бұл әдістің пайдасы зор.

Оқытушылардың алдында тұрған бірден-бір мақсат- алған білімдерін пайдаға асырып, өзара әрекет ете алатын азамат, ұлттық құндылықтарды меңгерген жеке тұлға тәрбиелеу. Интерактивті әдістің дәстүрлі әдістен ерекшелігі білім алушыны қозғалысқа түсіру.

Оқытушының интерактивті әдіс-тәсілдерді қолдану барысында ұйымдастыратын іс-әрекеттері:

Қызықты жағдайлар, хабарламалар беру;

Шығармашылықпен жұмыс істеуге арналған тапсырмалар беру;

Әр түрлі анықтамалармен жұмыс істеуге дағдыландыру;

Ғылыми әдебиеттерді оқуға баулу;

Жарыстар, сайыстар ұйымдастыру;

Әр түрлі танымдық ойындар ұйымдастыру;

Сабақтың әр түрлі формада өтуін қамтамасыз ету;

Телеарна мен мерзімді баспасөздерде берілген соңғы ғылыми жаңалықтармен таныстырып отыру.

Осы әдістерді сабақта қолдана отырып білім алушының ойлау тәсілдерін бақылауға болады. Берілген материалдан білім алушылар ең маңыздысын, ең бастысын бөліп алады, басқа нәрселермен салыстырады, оны жүйелеп, қорытындылайды, нақтылайды, анықтайды және ұғымға түсінік береді, оны дәлелдейді немесе жоққа шығарады, модельдейді. Оқытушы мен білім алушының интерактивтік шығармашылығы шектелмейді. Бүгін шығып жатқан әдістемелік инновациялар оқытудың интерактивтік әдісімен байланысқан.