Менің анам ұстаз тақырыбындағы қазақ тілі эссесі

Менің анам – ұстаз

«Ұстаз» деген ұлы сөз. Оны әрбір адам түсіне білсе ғой... «Өмірдің өзі - ұлы ұстаз», - деген мақалдың мағынасы аса терең. Менің анам - ұстаз. Анам осы мамандықты жастайынан сүйгенін үнемі тілге тиек етеді. Үйде нағыз ана да, мұғалім де бола білген анамды мақтан етемін. Жұмыстан келе сала біздің тоқтығымызды қамтамасыз етуге тырысады және оның інжу моншақтай тізілген жағымды сөздері көңіліне ой салады. Осы бір жұдырықтай жүрегіне мейірім мен ілтипатты, ақылдылықты, даналықты сыйдыра білген абзал жанның аялы алақаны мен үшін бәрінен де қымбат! Көз нұрын да шаршау байқалса да, білдірмеуге тырысып бағады. Түннің ортасына дейін дәптер тексеріп, әрбір сабағына шын беріле дайындалып отырғанын көріп, кей кезде жаным да ашиды.

Анам – біздің бақытымыз, отбасының шырағы. Өз анама деген махаббатым шексіз. Мен үшін анамның махабатынан қасиетті ештеңе жоқ.

Мектепте жүргенімде оқушылардың анам туралы айтқан жақсы сөздерін де естіп жүрмін. Анам оқушыларының әрбір жақсы істеріне қуанып, қиналған тұстарында әрқашан қол ұшын беруге даяр екенін баршасы біледі. Анамның мақсаты әрқашанда әр баланың тағдырына оң әсерін тигізу. Біздің өмірде өз орнымызды табуға бағыт-бағдар беруші де – анам. Әрине, ол біздің жеке көзқарасымызды, арманымызды, мақсатымызды қолдайды. Әкемнің де үйде көңілін таба білген дана жар деп айта аламын. Бос уақытында өз-өзін дамыту үшін көп ізденеді, көп күш жұмсайды, бізді де оған баулиды. «Білімдіге дүние жарық, білімсіздің күні кәріп», - деп бізге өз ақылын айтып отырады.

Міне, табиғаттың бір тамаша мезгілі көктем де келді! Жадыраған көктеммен бірге Аналар мекрекесі 8-наурыз да таяп қалды. Анамды мерекемен құттықтап, мына өлең жолын арнасам деймін:

Ұстаз

Ұстаз деген ұлы адам,

Шәкірттерге діні адал.

Қызың деп біл бұл мені,

Өлеңмен жыр құраған.

Мәртебелі мерейлі бәрің маған,

Өздеріңнен білім тек қабылдағам.

Шәкірттерің шынайы түсінеді,

Түсінеді жүрекпен жаныңды адал.