Менің мамандығым құқықтану туралы мақала

Менің мамандығым

Адам баласы өмірге келіп, өсіп жетілген сәттен бастап, арманға, қиялға беріледі, әр нәрсені армандап, іске асырғысы келеді. Өзім мектепке барғаннан, алдағы өміріме үмітпен қарап, қиялға берілетін едім. Білім алып қиялымызды шындыққа айналдырамыз. Әр нәрсеге еліктеп қарап, болашаққа жоспар құрамыз.

Мен өз таңдауымды мектеп кезінде жасағанмын. Ол заңгер болу. Алдыма ниет қойып, Болашақ колледжіне құжат тапсырып, алғашқы қадамымды жасадым. Оқуға түскеннен кейін, бойымды мақтаныш кернеп, өзімнің ең үздік колледждердің бірінде білім алып, арманыма бір қадам жақындағаныма қуандым.

Арманымдағы мамандығымды оқи отырып, аз ғана үш жыл ішінде өзім сияқты достар тауып, білімді, білікті ұстаздардан тәрбие, білім алдық. Жақсы жандар қасымда жүрген соң, арманымыз ұқсас болған соң, мамандығыма деген сүйіспеншілігім одан әрі күшейді. Колледж арқылы мамандық бойынша білім алумен қатар, бірнеше мамандығымызға қатысты мекемелерге барып, біраз тәжірибе жинап, мамандықтың қыр-сырымен таныстық. Білікті ұстаздардан үйренгеніміз көп. Осы мамандықты таңдағаныма ешқашан өкінген емеспін.

Адам баласы армандап қана қоймай, сол арманын іске асыруға тырысукерек . Мен өз арманымды іске асыруға қадам жасадым, енді қолыма армандаған мамандығымның куәлігін алып, еңбек жолын бастағым келеді. Өзім сияқты жастарға армандайық, арманды іске асырайық, өркениетті, мәдениетті елдің азаматы болайық дегім келеді.

Кударгулова Жұлдызхан

ЖШС "Каспий өңірі "Болашақ" колледжінің

"Құқықтану" мамандығының

3 курс студенті