Менің педагогикалық ұстанымым туралы эссе бастауышқа

Эссе

Менің педагогикалық ұстанымым

Ұстаз деген-ұстаз болып туғандар,

Ұлылықты ұлықтаған имандар.

Ұрпағының ертеңіне жол ашып,

Өмірімнің әр шақтарын қиғандар,-

деген өлең жолдарын оқығанда, мен өзімді бақытты сезінемін.

Мамандығымның қасиетті де құдіретті екендігіне мақтанамын. Мақтанамын, себебі біз әлемнің екінші ұстазы – Әл-Фараби бабамыздың ізбасарымыз. Мақтанамын, себебі өмірдегі көп мамандықтардың ішінде жан-жақты білімділікті, икемділікті, мейірімділікті қажет ететін мамандық - мұғалімдік мамандық.

«Мұғалім үнемі ізденіс үстінде болуы керек. Мұғалімнің үнемі ізденуі тоқтаған уақытта, оның жаңашылдығы да тоқтайды»– деген сөз нақты айтылған. Мен 2017 жылы осы кенттегі №1 орта мектебіне даярлық сыныбы мұғалімі болып жұмысқа орналастым. Ата-ана маған, мен сияқты жастарға сеніп, кішкентай бүлдіршіндерді жетелеп әкелді. Үкімет тарапынан жас мамандарға жағдай жасалып, көп көмек берілуде, сол себептен аянбай еңбек етуге әзірмін. Бүгінгі мүғалім үшін өзінің пәнін жете білу жеткіліксіз, ол міндетті түрде баланың психологиясын зерделеуі қажет. Менің ойымша, егер мұғалім өзінің жұмысын шынымен жақсы көретін болса, ол әрбір балаға ерекше бір қарым-қатынас арқылы жүрегіне жол табады. Неліктен мен осылай ойлаймын? Себебі, баламен жағымды қарым-қатынаста болмасаңыз, Сіз қаншалықты сабағыңызды жақсы түсіндіріп тұрсаңыз да, бала оны қабылдамайды.Бәрінен де бұрын, мұғалім балаларды шын жүрегімен жақсы көруі керек, олардың пікірлерімен санаса біліп, өзінің теңіндей көріп, олардың қуаныштары мен реніштерін бөлісе, олардың қиял әлеміне қоса ене білуі керек.

Қазіргі заманда әр тұлға ізденімпаз, ақпараттық технологияларды меңгерген, шыншыл, адал, өз ісінің нағыз шебері болу керек деп есептеймін. Мен өзіме және өзімнің еңбегіме нық сенемін. Дамыған елдер қатарына қосылған Қазақстанда өз еңбегіммен жетістіктерге жету - менің өмірлік мақсатым. Қазір мен жас бүлдіршіндерге ғылым негіздері мен тіршілік тынысын үйретіп, болашаққа өз үлесімді қосудамын.

Олар қандай болады, қандай құндылықтарды бойына сіңіреді? Жауапкершілігі жоғары істі мінсіз атқару оңай емес, бірақ мен мойымаймын, себебі алдымда арқа сүйер ағаларым мен апаларым бар, олардан алар үлгі-өнегем шексіз. Мен инновациялық технологияларды меңгерген шығармашыл мұғалім екендігімді, оқушыларды білім жолындағы бәсекелестікке тәрбиелеудегі бірден-бір тұлға екендігімді дәлелдегім келеді.