Менің жас көшбасшыларым туралы мақала

Менің жас Көшбасшыларым

ILEADER.KZ Республикалық дарынды

оқушылар порталы ұйымдастырған

шығармашылық байқауларға шәкірттеріңізді

дайындағаныңыз үшін алғыс білдіреміз.

Иә, әрбір мұғалім үшін мұндай мәтіндегі «Алғыс хат» алу үлкен бақыт. Әрине, бұл кішігірім жетістік болса да, көппен бөліскенді жөн деп санадым. 2018-2019 оқу жылының қаңтар айында «ILEADER.KZ – жас көшбасшы» Республикалық дарынды оқушылар порталының қолдауымен ұйымдастырылған жалпы республикалық сырттай байқауға қатысып 12 оқушым жүлделі орындармен марапатталды. Оқушыларды мақтап, мадақтап, көркем сөздермен ынталандырып өсіру, алға қарай жетелеу, бүгінгі күнде маңызды рөл атқарады. Оқушы жетістігі – мұғалім мерейі. Сондықтан жас көшбасшыларымның елеулі еңбектерін сіздерге паш еткім келеді. Өйткені олардың әрбір шығармашылық жұмысында жастарды жақсылыққа, адамгершілкке, еңбексүйгіштікке, отансүйгіштікке, үлгілі болуға бауырмалдылыққа жетелейтін үлкен тәрбиелік мән-мағына жатыр.

5 «Б» сынып оқушылары Уралбек Нұрлан мен Жантаева Ясмин «Поэзия әлемі» атты мәнерлеп оқу байқауына қатысып, даралығын көрсетіп, ерекше өнерімен Үздік деп танылып I дәрежелі дипломдармен марапатталды.

5 «Б» сынып оқушысы Панаш Гүлжахан «Менің ағам» өлеңі үшін I дәрежелі дипломмен марапатталды

Менің ағам

Ағамды мен мақтаймын,

Сенімін оның ақтаймын.

Жанашыр жан ағама

Бүгін өлең арнаймын.

Менің ағам салмақты

Бәрінен де ардақты.

Сегіз қырлы, бір сырлы

Өзі сондай жан-жақты.

Маған қамқор болады

Сөзіме құлақ салады.

Мен үшін ол әрқашан,

Үнемі уақыт табады.

Ағамның тілін аламын,

Жақсы қарындас боламын.

Сабағымды жақсы оқып,

Үлгілі қыз боламын.

5 «Б» сынып оқушысы Исраил Бейбіт «Ұрлық түбі қорлық» өлеңі үшін I дәрежелі дипломмен марапатталды

Ұрлық түбі қорлық

Жас достарым, бауырлар,

Сендер жақсы болыңдар.

Жамандықтан аулақ жүр

Адал адам болыңдар.

Біреудің затын алмаңдар,

Ұрлыққа еш бармаңдар.

Ұрлық түбі қорлық қой,

Соны естен шығармаңдар.

Жақсылықты үйреніп,

Жамандықтан жиреніп,

Тура жолмен жүріңдер

Құламаңдар сүрініп.

Білім алып мектептен,

Көрініңдер биіктен.

Үлгілі бол өмірде

Тілеймін шын жүректен.

5 «Б» сынып оқушысы Қалдыбай Ұлнұр «Менің ағам» өлеңі үшін II дәрежелі дипломмен марапатталды

Менің ағам

Қамқор болар кішіге,

Үлгі болар кісіге.

Ағаң болса, шіркін-ай,

Сеніп жүрер өмірде.

Әпкем, сіңлім, інім бар

Бауырларым осылар.

Ағам жоғы білінбес,

Жанымнан олар табылар

Әрбір қазақ баласын,

Ағам деп бәрі санасын.

Мен де сөйтіп білемін,

Ағам бар деп жүремін.

Барлық үлкен, ағалар,

Қазақ елін қорғаңдар.

Сіздерге біз сенеміз,

Әйел, қыздар, аналар!

5 «Б»сынып оқушысы Нұрнепес Олжас «Отан отбасынан басталады» өлеңі үшін I дәрежелі дипломмен марапатталды

Отан отбасынан басталады

Отан деген отбасынан басталады,

Барлық бала тәрбие мен үлгі алады.

Отбасыңа қамқор боп, қорған болсаң,

Мақтан етер ерлік боп саналады.

Отбасыңның басшысы – ата-анаң,

Олар саған болады мәңгі панаң.

Сондықтан ата-ананы құрметтеңдер,

Еңбегін бағалауға жетсін санаң.

Отаныңа қызмет етер азамат бол,

Отбасыңның айтар бізге тілегі сол.

Жақсы оқы, білім ал мектебіңнен,

Бәрі сенен үйренсін, әдепті бол.

Отан үшін мен әрқашан еңбек етем,

Елімнің туын көкке желбіретем.

Әке-шешем, бауырларым қалағандай,

Жақсы атқа ие болып, өсе берем!

5 «Б» сынып оқушысы Әмірбек Гүлназ «Су – тіршілік нәрі» тақырыбында эссе жазғаны үшін II дәрежелі дипломмен марапатталды

Су – тіршілік нәрі

Сусыз табиғатты, адамзатты елестету мүмкін емес. Сусыз ешқандай ағза өмір сүріп, тіршілік ете алмайды. Су күнделікті тіршілігімізге ең қажетті зат. Су жоқ болса ешбір жұмыс та жасай алмаймыз. Су болмаса тазалық та жоқ. Тазалық жоқ жерде денсаулық та жоқ. Сондықтан да суды бекерге ысырап қылмай үнемдеп жұмсауымыз керек. Әсіресе, ауыз суды үнемдеуіміз өте қажет.

Біз қала тұрғынымыз. Біздің әрбіріміздің үйімізде, мектебімізде суымыз ағып тұр. Кейде сол ағып тұрған суды барып алып ішуге ерінетін балалар бар. Ал кейбір адамдар суды шектен тыс қолданады. Бұл дұрыс емес, әрине. Еліміздегі кейбір ауылдық жерлерде суды алыс жақтардан тасып әкеліп ішеді. Міне, сол адамдар суды төкпей, үнемдеп, ысырап қылмай пайдаланады. Себебі су оларға оңайлықпен келген жоқ.

Дана халқымыз «Судың да сұрауы бар» деп тектен-тек айтпаған. Өйткені арғы дүниеге барғанда судың да есебі сұралады екен. Сол үшін де алдымыздан аққан судың қадіріне жетіп, барды бағалайық, достарым.

5 «Б» сынып оқушысы Байташов Оралхан «Жақсыдан үйрен, жаманнан жирен» атты эссе жазғаны үшін «Мақал-мәтел жаттайық» тақырыбындағы байқауда I дәрежелі дипломмен марапатталды

Жақсыдан үйрен, жаманнан жирен

Жабырқауды білмеймін,

Жалқаулықты сүймеймін.

Мен бақытты жас ұлан,

Үлгі аламын жақсыдан.

Менің эссе жазуға таңдаған тақырыбымды менің алға қойған мақсатым немесе өмірлік ұстаным деуге болады. Бұл ата-бабамыздан келе жатқан қазақтың мағыналы сөздерінің бірі. Адамдарды үнемі жақсылықты үйреніп, жаманнан аулақ жүруге үндейтін нақыл сөз.

«Жақсы» деген сөздің ішінде көп ұғым бар. Әдептілік, кішіпейілділік, адамгершілік қасиеттер, мәдениеттілік, білімділік, еңбексүйгіштік, отансүйгіштік сияқты бүкіл жақсы әдеттерді қамтиды. Осындай қаиеттерге ие адамдардан үйреніп, оларды үлгі тұтуымыз керек. Сондай-ақ, сол адам сияқты болуға тырысуымыз керек. «Жаман» сөзінің құрамына да көп ұғымдар жатады. Әдепсіз, жалқау, сабағын жақсы оқымайтын, үлкендерді құрметтемейтін әдеттері бар кісілердің іс-әрекетінен тұрады. Мұндай жаман әдеттерден жиренуіміз қажет. Мен осындай жаман мінезі бар достарыма оның кемшілігін, қателігін ескертіп, оның дұрыс жасамағанын айтамын. Өйткені біздің қазақтың «Сын түзелмей, мін түзелмейді» және «Дос жылатып айтады, дұшпан күлдіріп…