Шәкіртінің шыққан биігі – ұстаздың жетістігі мақаласы

Шәкіртінің шыққан биігі- ұстаздың жетістігі

«Ұстазы жақсының ұстанымы жақсы» дегендей білім ордамыздағы шәкірттердің кейбірі биік шыңдардан көрініп жүр. Өткізілген ғылыми жобалардың облыстық турында Абуталипова Асемгуль Бағытбайқызының жетекшілігімен 7 «А» сынып оқушылары Амина мен Гүлден облыстан жүлделі І орынды қанжығасына байлап, республикаға жолдама алып қайтқан еді. Сайыс барысында бірнеше оқушылары ғана облыстан жүлделі оралатын бұл ұжым үшін биылғы жыл абырой биігінен көрінген мерейлі жыл болды. Себебі Щучье қаласында өткен «Зерде» ХІV республикалық конкурсынан шәкірттері алдағы қатардан озық көрініп, Республикадан табысты оралды. Осындай нәтижеге бағытталған ғылыми еңбекке, ізденіске, шығармашылыққа үйретіп жүрген Асемгуль Бағытбайқызы ғылыми жоба зерттеуге машықтандыру жолында әрдайым талмай еңбек етуде. Асемгуль Бағытбайқызының шәкірттері үнемі жүлделі келіп, ұстаз мәртебесін көтеріп, биік белестерден көрінуде. Осындай жетістікке жеткен оқушылар ұстаздарының ғана емес, ауданның, облыстың мақтанышы.

«Бүгінгі болашақ – ертеңгі тарих» - деп айдар таққан додада Қостанай облысы Әулиекөл ауданы Құсмұрын ауылының екі өрені Жазықпаева Амина мен Баймұханова Гүлден Щучье қаласында өткен 1-7 сынып оқушыларының зерттеу жобалары мен шығармашылық жұмыстарының «Зерде» ХІV республикалық конкурсынан жүлделі ІІ орынды иеленіп келді. «Тіл білімі» (қазақ тілі мен әдебиеті) секциясында 5-7 сыныптар арасындағы 40 оқушының ішінен ерекше шығармашылықтарымен озып шықты.

Елбасы айтқандай, «Біліммен, ақылмен жарысатын заманда» Амина мен Гүлденнің осындай жетістіктерінің арта беруін тілейміз!

Әулиекөл ауданы,

№28 Құсмұрын ОМ математика және физика пәні мұғалімі

Игілік Арайлым Досымханқызы