Өлең мен сені аялап өтем қазақ әдебиеті жинағы

Өлең, мен сені аялап өтем!

«Фаризада халықтық рух бар, ол – елімен бірге, қазағынан бөлінбейтін ақын. Оның тілі жүйрік, өткірлігі мен тапқырлығы, қанағаттығы бәрімізді де қызықтыратын, қуантатын ақын» Әбділда Тәжібаев.

Биыл туғанына 80 жыл толғалы отырған Қазақ поэзиясының жарық жұлдызы, Халық жазушысы, Қазақстан Республикасы Мемлекеттік сыйлығының лауреаты Фариза Оңғарсыноваға деген халықтың құрметі ерекше. Туған халқына қалдырған жыр мұрасын мәңгілік сарқылмайтын өте бай қазына, ұлттық құндылық десек қателеспейміз. Фариза ақынның жырлары әрбір қазақтың жанына жақын, жүректерінде жатталып қалған. Әр адам ақынның өр рухты өлеңдерінен қуат алады.

Өмірдің өткелдерінен, Қиындық көп көргеніммен. Өртеніп от басқаныммен, Өзіңмен қоштаспадым мен,- дейді ақын өлеңге. Ия, Фаризаның өмірі-өлеңі. «Ақынға адамзаттан дос болмайды, тек қана сырын сөйлер қаламына», деп Мағжан айтқандай, жайшылықта екінің біріне сыр аша бермейтін Фариза ақын ойы мен сезіміне өлеңін ғана куә етті.

Қазақ елінің қай түкпіріне барса да Фаризаны өз перзентіндей аялап, әлпештейтін. Оны ел арасында ақылман Абайдай, алдаспан Махамбеттей, айтқыр Қасымдай, ақиық Мұқағалидай айрықша қастерлейтін. Нағыз бүкілхалықтық махаббатқа ие. Жұрт оны алмастай тіліп түсер өткірлігі үшін, бет қаратпас алапат батылдығы үшін өліп-өшіп жақсы көретін. Мұндай ыстық махаббатты өз тұсында Абай да, Махамбетте, Қасымда, Мұқағали да көре алмай кеткен-ді. Олар өмір сүрген өгей дәуір өте қытымыр еді. Ал Фариза көріп кетті. Бұлай болуы да әбден заңды еді. Өйткені оның тұсында халық махаббатының көрінуіне айдын жол ашылды. Оның үстіне Фаризаның өзі де соған лайық еді. «Сүйер ұлың болса сүй,сүйінерге жарар ол» деген осы еді.

«Кешегі дауылпаз Доспамбет, шамырқанған Шернияз, кәрі жорға Қазтуған, алдаспан Ақтамберді, жалаугер Махамбеттей әруақты да арынды жырдың жалғасы Фариза кішкене Манашта туып, барша Алаштың ақберген ақынынына айналған айтулы тұлға.

Фариза – бұл есім бүгін өрлік пен ерліктің сыршыл сұлулықтың, ұлылықтың символы. Фариза біреу де болса, бірегей деген ұғымды білдіреді. Оның отты жырлары ұлттың қуанышы да жұбанышы да болған. Белгілі жазушы Әбіш Кекілбаев айтқандай , Фариза өзінің талантына лайық тегеурінді мінез де…