Өндірістік тәжірибенің кәсіби дамудағы рөлі мақаласы

Өндірістік тәжірибенің кәсіби дамудағы рөлі

Еліміздің білім ордасы әл-Фараби атындағы ҚазҰУ білімгерлері мен зерттеушілері өздерінің ғылыми жұмыстарын ілгері өрбітуде. әл-Фараби атындағы ҚазҰУ-дың ғылыми зерттеулері әлемдік деңгейде танылады, университеттің профессорлары мен зерттеушілері түрлі халықаралық жобаларға қатысып, ғаламдық проблемаларды шешуге үлес қосуда. Сонымен қатар, әл-Фараби атындағы ҚазҰУ ғылыми және инновациялық стартаптар мен кәсіпкерлікті дамыту үшін көптеген мүмкіндіктер ұсынып, студенттер мен жас ғалымдардың идеяларын жүзеге асыруға ықпал етеді. Білім ордасы ғылыми жұмыстармен қоса өндірістік тәжірибе жұмыстарын да жүргізуде.

Қазіргі таңда психология ғылымы адам мінез-құлқын, эмоцияларын, ойлау процестерін және психикалық жай-күйлерін зерттейтін маңызды сала болып табылады. Бұл ғылым түрлі бағыттарға бөлінеді, соның ішінде когнитивті психология, әлеуметтік психология, клиникалық психология, нейропсихология, даму психологиясы және басқа да көптеген бағыттар бар. Психологияның қазіргі зерттеулерінде нейроғылымдармен, биологиямен және басқа да ғылым салаларымен тығыз байланыс орнаған, нәтижесінде адамның психикалық және физикалық жағдайларының арасындағы байланыс тереңірек зерттелуде.

Білім беру жүйесінде мектеп психологының рөлі ерекше. Ол оқушылардың психологиялық денсаулығын қолдау, тұлғалық дамуын бақылау және әлеуметтік бейімделуін қамтамасыз етуде маңызды орын алады. Осы мақсатта 144 мектеп-гимназиясында психология саласы бойынша өндірістік тәжірибеден өту – теориялық білімді практикамен ұштастырып, кәсіби біліктілікті арттырудың маңызды кезеңі болып табылады. 144 мектеп-гимназиясында психология бағытындағы өндірістік тәжірибе барысында оқушылардың психологиялық жағдайын зерттеу, олардың тұлғалық және эмоциялық даму ерекшеліктерін талдау, психологиялық көмек көрсету дағдыларын жетілдіру сияқты міндеттер орындалды.

Өндірістік тәжірибе кезінде келесі бағыттар бойынша жұмыс атқарылды:1)диагностикалық жұмыс:оқушылардың танымдық процестерін (зейін, ес, ойлау) бағалау мақсатында түрлі тест әдістемелері қолданылды.2)профилактикалық жұмыс:қарым-қатынас дағдыларын дамытуға арналған психологиялық тренингтер өткізілді.3)ата-аналар мен мұғалімдерге кеңес беру:балалардың психологиялық ерекшеліктері туралы ата-аналарға ақпараттық сессиялар өткізілді.

Өндірістік тәжірибе қорытындысы бойынша,144 мектеп-гимназиясында өткен тәжірибе – кәсіби дағдыларды дамытуға, білім беру үдерісіне терең бойлауға және оқушыларға психологиялық көмек көрсетудің маңыздылығын ұғынуға үлкен мүмкіндік берді. Бұл тәжірибе жас мамандардың кәсіби қалыптасуында маңызды рөл атқарады және болашақтағы табысты жұмыстың негізін қалайды.

Иркенбаева А.Қ

4-курс психология мамандығының студенті

Баймолдина Л.О

PhD,,доцент м.а.

Адилова Э.Т